Buxoro davlat universitetida “Talabalikka bag‘ishlov” marosimi bo‘lib o‘tdi. Birinchi kurs talabalarini universitet rektori A.Tulaganov talabalik maqomi bilan tabriklab, vatanga munosib kadrlar bo‘lib etishishlariga omad tiladi.
Rektor BuxDU bo‘yicha eng yuqori ball to‘plab (206,4) tarix fakultetiga o‘qishga kirgan Humoyun Solievning onasi Saida Solievaga ana shunday bilimdon, zakovatli farzandni tarbiyalab voyaga etkazgani uchun minnatdorchilik bildirib, faxriy yorliq topshirdi.Onaxon barcha birinchi kurs talabalarini qutlab, yaxshi bilim olib, yurtimiz ilmu fani rivojiga hissa qo‘shishlarini tiladi. Qolaversa, respublika fan olimpiadalarida g‘olib chiqqan yigit-qizlar ham faxriy yorliq va tashakkurnomalar bilan taqdirlandilar.
Shundan so‘ng universitetning bayramona bezatilgan yig‘ilishlar zalida tadbirning badiy qismi boshlandi. Pedagogika fakultetining musiqa yo‘nalishi talabalarining chiqishlari yoshlar olqishiga sazovor bo‘ldi. "Talabalikka bag‘ishlov" marosimi BuxDUda ana shunday tantanali ravishda o‘tdi.
Mannon Otaboy
BuxDu: matbuot kotibi
