03.04.2026

BuxDUda inklyuziv ta’lim: Imkoniyati cheklangan talabalar uchun yangi tashabbuslar muhokama qilinmoqda

Buxoro davlat universitetida “Universitetda yaratilgan inklyuziv imkoniyatlar” mavzusida davra suhbati bo‘lib o‘tmoqda. Tadbirni Axborot-resurs markazi (ARM) direktori A.A. Qilichev ochib berib, bugungi kunda markazda imkoniyati cheklangan talaba-yoshlar uchun yaratilgan zamonaviy sharoitlar va qulayliklar haqida to‘xtalib o‘tdi.

Uchrashuvda universitet tayanch doktoranti Dilshodjon To‘ymurodov tomonidan ilgari surilgan takliflar barchada katta qiziqish uyg‘otdi. Xususan, u ARMda volontyorlar ko‘magida maxsus “Inklyuziv burchak” tashkil etish hamda talabalarning sezish ongi va mustaqil mutolaa ko‘nikmalarini rivojlantirish uchun Brayl alifbosidagi kitoblar fondini yanada boyitish tashabbusi bilan chiqdi.

Tadbirda O‘zbekiston Ko‘zi ojizlar jamiyati Buxoro viloyati bo‘limi raisi Jalil Rahmatov ishtirok etib, imkoniyati cheklangan yoshlarning oliy ta’limga integratsiyalashuvi va ularni ijtimoiy qo‘llab-quvvatlashning ahamiyati haqida so‘z yuritdi. Ochiq muloqot tarzida o‘tgan uchrashuvda universitetda tahsil olayotgan talaba-yoshlar o‘zlarini qiziqtirgan masalalar yuzasidan savollar berib, ta’lim jarayonini yanada takomillashtirish bo‘yicha o‘z takliflarini bildirdilar. Bunday tadbirlar universitetda barcha uchun teng imkoniyatlar yaratish va to‘siqsiz akademik muhitni barqarorlashtirishga xizmat qiladi.

PAYSHANBA - YOSHLAR KUNI