25.04.2026

Buxoro davlat universitetida O‘zbekiston Respublikasi Mustaqilligining 35 yilligiga bag‘ishlangan “Siyosiy fanlarning dolzarb masalalari – 2026: raqamlashtirish, xavfsizlik va global tendensiyalar bo‘yicha ilmiy forum” mavzusidagi respublika ilmiy-amaliy konferensiyasi bo‘lib o‘tdi.

Tantanali tadbir O‘zbekiston Respublikasi Davlat madhiyasi ijrosi bilan boshlandi. Anjumanni universitet rektori, professor Obidjon Xamidov ochib, Buxoro shahrining zamonaviy diplomatiyadagi o‘rni va strategik ahamiyatiga alohida to‘xtaldi:

“Bugun Buxoro nafaqat boy tarixiy meros maskani, balki mintaqaviy diplomatiyaning muhim maydoniga aylanib bormoqda. So‘nggi yillarda qo‘shni davlatlar rahbarlarining Buxoroga tashriflari va oliy darajadagi muloqotlar shaharning xalqaro siyosiy nufuzini yangi bosqichga ko‘tardi. Mazkur ilmiy forumning aynan BuxDUda tashkil etilishi raqamli transformatsiya va xavfsizlik masalalarida akademik hamkorlikni mustahkamlash yo‘lidagi muhim qadamdir”.

Anjumanning yalpi majlisida respublikaning yetakchi olim va ekspertlari tomonidan dolzarb mavzularda fundamental ma’ruzalar taqdim etildi. Jumladan, ISFT xalqaro instituti rektor maslahatchisi, professor Jo‘rayev, Jahon iqtisodiyoti va diplomatiya universiteti professori G. Jumayeva, Strategik tahlil va istiqbolni belgilash oliy maktabi kafedra mudiri, professor I. Islomov, O‘zbekiston milliy universiteti professori K. Mirzaxmedov hamda Buxoro davlat universiteti professori S. Raupov o‘z chiqishlarida xalqaro xavfsizlikni raqamlashtirish, siyosiy jarayonlarni modellashtirish va milliy davlatchilik asoslarini tadqiq etishning muhim jihatlarini tahlil qildilar.

Forum davomida raqamlashtirish davrida davlat boshqaruvini takomillashtirish va siyosiy fanlar sohasida kadrlar tayyorlash sifatini oshirish yuzasidan muhim taklif va tavsiyalar ishlab chiqildi. Mazkur ilmiy muloqot mamlakatimiz strategik tafakkurini boyitish va ilm-fan yutuqlarini amaliyot bilan integratsiya qilishda muhim ahamiyat kasb etdi.

BuxDU Axborot xizmati