24.04.2026

Buxoro davlat universitetining “Universal” sport majmuasida oliy ta’lim muassasalarida tahsil olayotgan talaba-qizlar o‘rtasidagi “To‘maris izdoshlari” sport musobaqasining hududiy bosqichi ko‘tarinki ruhda va yuqori saviyada bo‘lib o‘tdi. Mazkur musobaqa talaba-qizlarning jismoniy salohiyatini oshirish, ularning sportga bo‘lgan qiziqishini kuchaytirish, sog‘lom turmush tarzini targ‘ib etish, jamoaviylik, chaqqonlik va tezkorlik ko‘nikmalarini rivojlantirish maqsadida tashkil etildi.

Tadbirning ochilish marosimi O‘zbekiston Respublikasi Davlat madhiyasi ijrosi bilan boshlandi. Musobaqani Buxoro davlat universiteti rektori Obidjon Xamidov ochib berdi. U o‘z tabrik so‘zida talaba-qizlarning sportdagi faolligini qo‘llab-quvvatlash, yoshlar, ayniqsa, qizlarning jismoniy va ma’naviy barkamolligini ta’minlash, sog‘lom va faol hayot tarzini qaror toptirish bugungi kunning muhim vazifalaridan biri ekanini alohida ta’kidlab, barcha ishtirokchilarga omad tiladi.

Musobaqa Buxoro davlat universiteti xotin-qizlar bilan ishlash bo‘limi hamda Sport va san’at fakulteti hamkorligida tashkil etildi. Unda Buxoro davlat universiteti, Buxoro davlat pedagogika instituti, Buxoro davlat texnika universiteti hamda Buxoro davlat tibbiyot institutining saralash bosqichida g‘olib bo‘lgan jamoalari ishtirok etdi. Dasturga muvofiq, ishtirokchi jamoalar “Jamoani tanishtirish”, “Sport bilan hamnafasmiz”, “Birinchi tibbiy yordam” hamda “Velosipedda uchish” shartlari bo‘yicha o‘zaro bellashdilar.

Musobaqa davomida talaba-qizlar o‘zlarining jismoniy tayyorgarligi, amaliy ko‘nikmalari, jamoaviy hamjihatligi, epchilligi va tezkorligini namoyon etdilar. Ayniqsa, birinchi tibbiy yordam va sportga oid amaliy shartlar ishtirokchilarning tayyorgarlik darajasini yaqqol ko‘rsatdi.

Qizg‘in va murosasiz bahslarga boy tarzda o‘tgan musobaqa yakunida hakamlar hay’ati tomonidan quyidagi natijalar e’lon qilindi:

1-o‘rin — Buxoro davlat universiteti jamoasi

2-o‘rin — Buxoro davlat pedagogika instituti jamoasi

2-o‘rin — Buxoro davlat texnika universiteti jamoasi

3-o‘rin — Buxoro davlat tibbiyot instituti jamoasi

Musobaqa yakunlari talaba-qizlarning nafaqat sportga, balki jamoada ishlash, mas’uliyatni his etish, tezkor va to‘g‘ri qaror qabul qilish kabi muhim hayotiy ko‘nikmalarga ham ega ekanini namoyon etdi. Umuman, “To‘maris izdoshlari” sport musobaqasining hududiy bosqichi talaba-qizlar o‘rtasida sog‘lom raqobat muhitini shakllantirish, ularni sport va faol hayotga keng jalb etish, shuningdek, oliy ta’lim muassasalari o‘rtasidagi do‘stona aloqalarni mustahkamlashda muhim ahamiyat kasb etdi.

BuxDU Axborot xizmati