03.10.2026

Buxoro davlat universitetida O‘zbekiston Respublikasi Oliy ta’lim, fan va innovatsiyalar vazirligi tashabbusi bilan talaba-qizlar o‘rtasida “IT Queens — kelajakni yaratuvchi qizlar” innovatsion tanlovining Buxoro viloyati bosqichi o‘tkazildi.

Tanlov talaba-qizlarning axborot texnologiyalari, sun’iy intellekt, robototexnika va zamonaviy innovatsion ishlanmalarga bo‘lgan qiziqishini qo‘llab-quvvatlash, ularning IT sohasidagi bilim va salohiyatini yuzaga chiqarish, istiqbolli g‘oya va loyihalarni rag‘batlantirishga qaratildi.

Tanlovni Buxoro davlat universiteti rektori, professor Obidjon Xamidov kirish so‘zi bilan ochib berdi. Rektor bugungi kunda axborot texnologiyalari, sun’iy intellekt va raqamli innovatsiyalar jamiyat taraqqiyotining muhim omillaridan biriga aylanib borayotganini ta’kidlab, talaba-qizlarning mazkur yo‘nalishlardagi tashabbuslarini qo‘llab-quvvatlash va ularning innovatsion salohiyatini ro‘yobga chiqarish muhim ahamiyatga ega ekanini qayd etdi. Shuningdek, barcha ishtirokchilarga muvaffaqiyat tiladi.

Viloyat bosqichida Buxoro viloyatidagi davlat oliy ta’lim muassasalarining oliygoh bosqichida g‘olib bo‘lgan iqtidorli talaba-qizlari o‘z innovatsion g‘oya va loyihalarini hakamlar hay’atiga taqdim etdilar.

Ishtirokchilar dasturiy ta’minot, veb-ishlanmalar, mobil ilovalar, sun’iy intellekt, kiberxavfsizlik, raqamli ta’lim, mexatronika va robototexnika, aqlli qurilmalar hamda IoT yechimlari yo‘nalishlaridagi ishlanmalarining maqsadi, texnik yechimi, funksionalligi, innovatsion jihatlari va amaliy ahamiyatini taqdimot hamda amaliy namoyishlar orqali himoya qildilar.

Loyihalar 100 ballik baholash tizimi asosida funksionallik, texnik sifat, innovatsionlik, amaliy ahamiyat va taqdimot sifati kabi mezonlar bo‘yicha baholandi.

Tanlov g‘oliblari

Raqamli ta’lim yo‘nalishi:
Azizabonu Azamatova — Buxoro davlat universiteti

Sun’iy intellekt yo‘nalishi:
Norjon Fattoyeva — Buxoro davlat universiteti

Mobil ilova yo‘nalishi:
Sitora Raupova — Buxoro davlat universiteti

Mexatronika va robototexnika yo‘nalishi:
Zahro Latipova — Buxoro davlat universiteti

Dasturiy ta’minot yo‘nalishi:
Ruxshona Rustamova — Buxoro davlat texnika universiteti

Veb-ishlanmalar yo‘nalishi:
Dilnura Farxodova — Buxoro davlat pedagogika instituti

Kiberxavfsizlik yo‘nalishi:
Ruxshona Toshpo‘latova — Buxoro davlat texnika universiteti

Aqlli qurilmalar va IoT yechimlari yo‘nalishi:
Marjona Xalilova — Buxoro davlat texnika universiteti

Tanlov yakunida g‘oliblar va faol ishtirokchilar qimmatbaho sovg‘alar bilan rag‘batlantirildi. Har bir yo‘nalishda 1-o‘rinni egallagan ishtirokchilar tanlovning respublika bosqichida qatnashish huquqini qo‘lga kiritdi.

E’tiborlisi, sakkizta yo‘nalishning to‘rttasida — raqamli ta’lim, sun’iy intellekt, mobil ilova hamda mexatronika va robototexnika yo‘nalishlarida Buxoro davlat universiteti talabalari 1-o‘rinni egalladi.

“IT Queens — kelajakni yaratuvchi qizlar” tanlovi talaba-qizlarning IT va raqamli texnologiyalar sohasidagi salohiyatini namoyon etishi, innovatsion g‘oyalarini amaliy loyihalarga aylantirishi hamda yangi texnologik tashabbuslar bilan maydonga chiqishi uchun muhim platforma bo‘ldi.

BuxDU Axborot xizmati