23.09.2026

Buxoro davlat universiteti delegatsiyasining Xitoy Xalq Respublikasining Shinjon-Uyg‘ur avtonom rayoniga tashrifi doirasida Buxoro davlat universiteti va Shinjon universiteti (Xinjiang University) rahbariyati o‘rtasida rasmiy uchrashuv tashkil etildi.
Uchrashuvda Buxoro davlat universiteti rektori Obidjon Xamidov hamda Shinjon universiteti rektori Ma Xinbin boshchiligidagi ikki oliy ta’lim muassasasi vakillari ishtirok etdi.

Muzokaralarda ta’lim, ilm-fan va innovatsiyalar sohalaridagi hamkorlikni rivojlantirish istiqbollari muhokama qilindi. Xususan, professor-o‘qituvchilar, yosh olimlar va talabalar akademik mobilligini yo‘lga qo‘yish, qo‘shma ilmiy tadqiqotlar va xalqaro loyihalarni amalga oshirish, ilmiy tajriba almashish hamda istiqbolda qo‘shma ta’lim dasturlarini tashkil etish masalalariga alohida e’tibor qaratildi.

Tashrif doirasida BuxDU delegatsiyasi Shinjon universitetining Xitoy–Markaziy Osiyo ta’lim almashinuvi va hamkorlik markazi faoliyati bilan ham yaqindan tanishdi. Markazda Xitoy va Markaziy Osiyo davlatlari oliy ta’lim muassasalari o‘rtasidagi akademik aloqalarni rivojlantirish, talabalar va professor-o‘qituvchilar almashinuvini kengaytirish, qo‘shma ta’lim hamda ilmiy loyihalarni amalga oshirish imkoniyatlari yuzasidan fikr almashildi.

Shuningdek, delegatsiya Shinjon universitetining Aqlli qishloq xo‘jaligi instituti faoliyati bilan tanishdi. Zamonaviy agrotexnologiyalar, raqamli va aqlli dehqonchilik, qishloq xo‘jaligida innovatsion yechimlardan foydalanish hamda mazkur yo‘nalishlarda qo‘shma ilmiy tadqiqotlarni rivojlantirish istiqbollari muhokama qilindi.

Mazkur tashrif BuxDUning qishloq xo‘jaligi va agroinnovatsiyalar yo‘nalishidagi ilmiy salohiyatini xalqaro hamkorlik asosida rivojlantirish, ilg‘or tajribalarni o‘rganish va ularni ta’lim hamda ilmiy-tadqiqot jarayonlariga tatbiq etish uchun yangi imkoniyatlarni belgilab berdi.

Rasmiy uchrashuv yakunida Buxoro davlat universiteti va Shinjon universiteti o‘rtasida hamkorlik memorandumi imzolandi. Hujjat ikki universitet o‘rtasida ta’lim, ilmiy tadqiqotlar, akademik almashinuv, innovatsiyalar va qo‘shma loyihalar yo‘nalishidagi aloqalarni izchil rivojlantirish uchun muhim asos bo‘lib xizmat qiladi.

Uchrashuvlar va erishilgan kelishuvlar BuxDUning Xitoy oliy ta’lim va ilmiy muassasalari bilan hamkorlik ko‘lamini kengaytirish, O‘zbekiston–Xitoy ilmiy-akademik aloqalarini mustahkamlash hamda hamkorlik tashabbuslarini amaliy loyihalarga aylantirish yo‘lidagi navbatdagi muhim qadam bo‘ldi.

BuxDU Axborot xizmati