07.09.2026

Buxoro davlat universitetida 2026/2027-o‘quv yilining boshlanishi, “Talabalikka bag‘ishlov” tadbiri hamda 2700 o‘rinli yangi zamonaviy o‘quv binosining tantanali ochilish marosimi bo‘lib o‘tdi.

Tantanali tadbirda Buxoro viloyati hokimi Botir Zaripov, O‘zbekiston Milliy axborot agentligi direktori, senator Abdusaid Ko‘chimov, “Yangi O‘zbekiston” va “Pravda Vostoka” gazetalari bosh muharriri, O‘zbekistonda xizmat ko‘rsatgan jurnalist Salim Doniyorov, respublika va viloyat miqyosidagi mehmonlar, davlat va jamoat tashkilotlari rahbarlari, faxriy ustozlar, professor-o‘qituvchilar, talaba-yoshlar hamda keng jamoatchilik vakillari ishtirok etdi.

Tadbirni Buxoro viloyati hokimi Botir Zaripov ochib, universitet jamoasi va talaba-yoshlarni yangi o‘quv yilining boshlanishi hamda yangi o‘quv binosining foydalanishga topshirilishi bilan samimiy muborakbod etdi.

Viloyat rahbari o‘z nutqida mamlakatimizda ta’lim va ilm-fanga qaratilayotgan e’tibor, yoshlar uchun yaratilayotgan imkoniyatlar, zamonaviy bilim va kasbiy ko‘nikmalarni egallash uchun shakllantirilayotgan muhit hamda Buxoro davlat universitetida amalga oshirilayotgan bunyodkorlik ishlarining ahamiyatiga alohida to‘xtaldi.

“Bugungi tadbir faqat yangi o‘quv yilining boshlanishi emas. Bu — yoshlarimiz uchun yangi imkoniyatlar eshigi ochilayotgani, ta’lim va ilm-fanga qaratilayotgan ulkan e’tiborning yana bir amaliy ifodasi, Buxoro ta’lim tizimi taraqqiyotidagi muhim qadamdir”, — dedi Botir Zaripov.

Yangi o‘quv yili — yangi maqsadlar sari

Tantanali tadbirda Buxoro davlat universiteti rektori, professor Obidjon Xamidov so‘zga chiqib, universitet jamoasi, professor-o‘qituvchilar va talaba-yoshlarni 2026/2027-o‘quv yilining boshlanishi bilan qutladi.

Rektor, ayniqsa, universitet safiga yangi qo‘shilgan birinchi bosqich talabalarini “BuxDU talabasi” degan sharafli nomga sazovor bo‘lgani bilan muborakbod etib, ularni universitetda yaratilgan imkoniyatlardan unumli foydalanish, puxta bilim egallash, ilmiy va ijodiy izlanishlarda faol bo‘lishga chaqirdi.

Joriy o‘quv yilida universitet bakalavriatining 71 ta ta’lim yo‘nalishiga 4 432 nafar yosh o‘qishga tavsiya etildi. Ularning 1 017 nafari davlat granti asosida tahsil olish imkoniyatiga ega bo‘ldi. 190 nafar abituriyent maksimal 189 ball bilan universitetni tanlagan bo‘lsa, 23 nafar yosh SAT sertifikati asosida qo‘shimcha davlat grantiga tavsiya etildi.

Tadbirda O‘zbekiston Milliy axborot agentligi direktori, senator Abdusaid Ko‘chimov ham talaba-yoshlarni yangi o‘quv yili bilan tabriklab, ularni bilim olish, ilm-fan va ma’rifat yo‘lida izlanish hamda zamonaviy axborot va media muhitida faol bo‘lishga chaqirdi.

“Yangi O‘zbekiston” va “Pravda Vostoka” gazetalari bosh muharriri, O‘zbekistonda xizmat ko‘rsatgan jurnalist Salim Doniyorov esa yoshlarga ezgu tilaklarini bildirib, yuksak bilim va keng dunyoqarashga ega, Vatan taqdiriga daxldorlik hissi bilan yashaydigan yoshlarning mamlakat taraqqiyotidagi o‘rni haqida fikr yuritdi.

“Mustaqillik darslari”da yoshlar bilan muloqot

Tadbirlar doirasida “Yagona Vatan, yagona xalq bo‘lib, yangi hayot va kelajak yarataylik!” shiori ostida “Mustaqillik darslari” ham tashkil etildi.

Buxoro viloyati hokimi Botir Zaripov “Mustaqillik darslari”da ishtirok etib, talaba-yoshlar bilan muloqot qildi. Muloqot davomida mustaqillikning yosh avlod hayotidagi o‘rni, bugungi kunda ta’lim olish va kasbiy kamol topish uchun yaratilayotgan imkoniyatlardan samarali foydalanish, Vatan taraqqiyotiga bilim va salohiyat bilan munosib hissa qo‘shish masalalariga e’tibor qaratildi.

Shuningdek, viloyat rahbari Buxoro davlat universitetining yangi tuzilmasi bilan yaqindan tanishdi. Universitet tarkibida shakllantirilgan yangi fakultet va ilmiy-tadqiqot institutlarining faoliyat yo‘nalishlari, ta’lim va ilm-fan integratsiyasini kuchaytirishga qaratilgan vazifalar hamda yangi o‘quv yilida amalga oshiriladigan ishlar haqida ma’lumot berildi.

86,5 milliard so‘mlik zamonaviy majmua foydalanishga topshirildi

Tadbirning muhim voqealaridan biri universitetda bunyod etilgan 2700 o‘rinli yangi zamonaviy o‘quv binosining tantanali ochilishi bo‘ldi.

Universitetning o‘z mablag‘lari hisobidan 86,5 milliard so‘m yo‘naltirilib, 2700 o‘rinli o‘quv binosi, Quyosh fizikasi ilmiy-tadqiqot laboratoriyasi, Axborot-resurs markazi va 400 o‘rinli talabalar turar joyidan iborat zamonaviy majmua barpo etildi.

Ochilish marosimida faxriy mehmonlar tomonidan ramziy qizil lenta kesilib, yangi o‘quv binosi rasman foydalanishga topshirildi. Shuningdek, yangi binoning ramziy kaliti universitet jamoasiga tantanali ravishda taqdim etildi.

Shundan so‘ng viloyat hokimi va mehmonlar yangi bino hamda undagi zamonaviy infratuzilma bilan yaqindan tanishdilar. Zamonaviy auditoriyalar, ta’lim va ilmiy faoliyat uchun mo‘ljallangan xonalar, raqamli va innovatsion ta’lim muhiti talabalarning sifatli bilim olishi, ilmiy-tadqiqot va ijodiy izlanishlar olib borishi uchun keng imkoniyat yaratadi.

Yangi o‘quv binosida Iqtisodiyot va turizm, Davlat auditi, Xorijiy tillar hamda Yurisprudensiya fakultetlari faoliyat yuritishi ko‘zda tutilgan.

BuxDU taraqqiyotining navbatdagi yirik bosqichi

Universitetning istiqboldagi taraqqiyoti uchun yana bir yirik loyiha amalga oshirilmoqda. Xususan, 30,2 gektar maydonda Buxoro davlat universitetining yangi zamonaviy kampusi barpo etilmoqda.

Mazkur kampus tarkibida 20 ming o‘rinli o‘quv binolari hamda 5 400 o‘rinli talabalar turar joylarini qurish rejalashtirilgan. Yirik loyiha universitetning ta’lim va ilmiy salohiyatini kengaytirish, talabalar uchun zamonaviy va qulay muhit yaratish hamda Buxoroning mamlakatimizdagi yirik ta’lim va ilm-fan markazlaridan biri sifatidagi nufuzini yanada yuksaltirishga xizmat qiladi.

2026/2027-o‘quv yilining boshlanishi, “Talabalikka bag‘ishlov” tantanasi, “Mustaqillik darslari”, yangi universitet tuzilmasi faoliyatining yo‘lga qo‘yilishi hamda zamonaviy ta’lim majmuasining foydalanishga topshirilishi Buxoro davlat universiteti hayotida yangi bosqichni boshlab berdi. Yangi o‘quv yili BuxDU jamoasi uchun ta’lim sifati, ilmiy salohiyat va talaba-yoshlar uchun yaratilayotgan imkoniyatlarni yanada yuksaltirish sari yangi marralar davri bo‘lib xizmat qiladi.

BuxDU Axborot xizmati