13.08.2026

Ta’lim sifatini ta’minlash milliy agentligi tomonidan o‘tkazilayotgan Umummilliy ish beruvchilar so‘rovnomasi doirasida Buxoro davlat universiteti bitiruvchilarining kasbiy tayyorgarligi, amaliy ko‘nikmalari va mehnat bozoridagi faoliyati bevosita ish beruvchilar fikri asosida o‘rganilmoqda. Mazkur jarayon doirasida BuxDUda so‘rovnomaning maqsad va vazifalari muhokama qilinib, bitiruvchilar faoliyat yuritayotgan qator tashkilotlarda amaliy o‘rganishlar olib borildi.

Umummilliy so‘rovnomaning asosiy maqsadi bitiruvchilarning ta’lim jarayonida egallagan bilim, ko‘nikma va kasbiy kompetensiyalarini ish beruvchilar bahosi asosida tahlil qilish, ularning amaliy faoliyatdagi natijadorligini aniqlash hamda kadrlar tayyorlash sifatini real mehnat bozori ehtiyojlariga yanada uyg‘unlashtirishdan iborat.

Bugungi kunda Buxoro davlat universiteti bitiruvchilari davlat boshqaruvi, bank-moliya tizimi, sanoat, turizm, xavfsizlik, ijtimoiy himoya va ta’lim kabi turli sohalarda samarali faoliyat yuritmoqda. Jumladan, Ijtimoiy himoya milliy agentligining Buxoro viloyati boshqarmasi, Xalq banki, Biznesni rivojlantirish banki, Agrobank, Tashqi iqtisodiy faoliyat Milliy banki, Milliy gvardiyaning Buxoro viloyati Qo‘riqlash boshqarmasi, Navoiy kon-metallurgiya kombinati, shuningdek, hududdagi ko‘plab ta’lim muassasalarida universitet bitiruvchilari mehnat qilmoqda.

Amaliy o‘rganishlarning dastlabki manzillaridan biri Buxoro viloyati Turizm boshqarmasi bo‘ldi. Ayni paytda mazkur tashkilotda Buxoro davlat universitetining 10 nafardan ortiq bitiruvchisi faoliyat yuritmoqda. O‘rganish jarayonida ularning kasbiy tayyorgarligi, amaliy ko‘nikmalari, egallab turgan lavozimlariga muvofiqligi va mehnat faoliyatidagi natijalari yuzasidan ish beruvchilarning baholari, fikr va takliflari o‘rganildi.

Navbatdagi amaliy o‘rganish “Buxoro Varnet” agro-ekoturizm klasterida tashkil etildi. Korxonada bugungi kunda BuxDUning 18 nafar bitiruvchisi faoliyat yuritmoqda. Ularning kasbiy kompetensiyalari, zamonaviy texnologiyalardan foydalanish ko‘nikmalari, amaliy tayyorgarligi hamda ishlab chiqarish jarayonlariga moslashuvchanligi bo‘yicha ish beruvchilarning baholari tahlil qilindi.

O‘rganishlar davomida “Buxoro Varnet” va Buxoro davlat universiteti o‘rtasidagi ilmiy-amaliy hamkorlik natijalariga ham alohida e’tibor qaratildi. Xususan, universitetning “Agrobiohimoya” laboratoriyasida yetishtirilayotgan foydali entomofaglarning korxona issiqxonalarida amaliyotga joriy etilishi ekologik xavfsiz va sifatli mahsulot yetishtirishga xizmat qilmoqda. Ushbu hamkorlik “ta’lim – fan – ishlab chiqarish” integratsiyasining amaliy samaradorligini namoyon etuvchi muhim tajribalardan biri sifatida e’tirof etildi.

Ish beruvchilarning bevosita fikr-mulohazalarini o‘rganish universitet uchun kadrlar tayyorlash tizimining kuchli jihatlarini aniqlash bilan bir qatorda, ta’lim dasturlarini takomillashtirish zarur bo‘lgan yo‘nalishlarni belgilash imkonini ham beradi. Shu jihatdan, so‘rovnoma natijalari o‘quv dasturlarini mehnat bozori talablariga mos ravishda yangilash, talabalarning amaliy tayyorgarligini kuchaytirish hamda ish beruvchilar bilan hamkorlik mexanizmlarini yanada rivojlantirish uchun muhim tahliliy manba bo‘lib xizmat qiladi.

Mazkur o‘rganishlar asosida shakllantiriladigan xulosa va tavsiyalar ta’lim mazmuni, bitiruvchilarning kasbiy kompetensiyalari va zamonaviy mehnat bozori talablari o‘rtasidagi uzviy bog‘liqlikni yanada mustahkamlashga yo‘naltiriladi.

Buxoro davlat universiteti ish beruvchilar bilan tizimli hamkorlikni rivojlantirish, ta’lim jarayonini real sektor ehtiyojlari bilan uyg‘unlashtirish hamda zamonaviy mehnat bozorida munosib o‘rin egallay oladigan bilimli, malakali va raqobatbardosh mutaxassislarni tayyorlash borasidagi ishlarni izchil davom ettirmoqda.

BuxDU Axborot xizmati