08.08.2026

Buxoro davlat universiteti va Abu Rayhon Beruniy nomidagi Urganch davlat universiteti o‘rtasidagi ilmiy-akademik aloqalarni yanada rivojlantirishga qaratilgan o‘zaro hamkorlik memorandumi imzolandi.

Buxoro davlat universiteti rektori Obidjon Xamidov hamda O‘zbekiston Qahramoni, akademik Muhammadjon Axmedov Urganch davlat universitetiga tashrif buyurdi. Mehmonlarni Urganch davlat universiteti rektori Feruza Madrahimova kutib oldi.

Tashrif doirasida o‘tkazilgan uchrashuvda ikki oliy ta’lim muassasasi o‘rtasidagi mavjud aloqalarni yanada mustahkamlash, ta’lim va ilm-fan sohasida o‘zaro tajriba almashish hamda hamkorlikning yangi istiqbolli yo‘nalishlarini belgilash masalalari muhokama qilindi.

Muzokaralarning amaliy natijasi sifatida Buxoro davlat universiteti va Urganch davlat universiteti o‘rtasida o‘zaro hamkorlik to‘g‘risidagi memorandum imzolandi.

Mazkur memorandum professor-o‘qituvchilar, ilmiy xodimlar, doktorantlar va talabalar almashinuvini yo‘lga qo‘yish, akademik mobillikni rivojlantirish, qo‘shma ilmiy tadqiqot va innovatsion loyihalarni amalga oshirish, xalqaro grantlar va ilmiy dasturlarda hamkorlik qilish hamda ilmiy-uslubiy adabiyotlarni birgalikda tayyorlash kabi qator yo‘nalishlarni qamrab oladi.

Shuningdek, tomonlar sun’iy intellekt, raqamli ta’lim texnologiyalari va raqamli transformatsiya sohalarida tajriba almashish, yosh olimlar hamda iqtidorli talabalarni ilmiy va innovatsion faoliyatga keng jalb etishga alohida e’tibor qaratishga kelishib oldilar.

O‘z navbatida, Buxoro davlat universiteti rektori Obidjon Xamidov mazkur hamkorlikning ahamiyatiga to‘xtalib, ikki universitetning ilmiy va akademik salohiyatini birlashtirish yangi tadqiqotlar, innovatsion tashabbuslar hamda yosh olimlar uchun qo‘shimcha imkoniyatlar yaratishini ta’kidladi.

Imzolangan memorandum BuxDU va UrDU o‘rtasidagi hamkorlikni yangi bosqichga olib chiqish, ilm-fan va ta’lim integratsiyasini kuchaytirish hamda ikki universitetning mavjud ilmiy salohiyatidan samarali foydalanishga xizmat qiladi.

BuxDU Axborot xizmati