10.08.2026

“Dolzarb 90 kun” dasturi doirasida Buxoro davlat universitetining 50 nafar talaba va pedagog-xodimlaridan iborat jamoasi uchun universitet xodimlari kasaba uyushmasi qo‘mitasi bilan hamkorlikda Toshkent shahriga ma’naviy-ma’rifiy sayohat tashkil etildi.

Sayohat dasturi doirasida BuxDU jamoasi O‘zbekistondagi Islom sivilizatsiyasi markazi, G‘alaba bog‘idagi “Shon-sharaf” davlat muzeyi hamda Qatag‘on qurbonlari xotirasi muzeyiga tashrif buyurdi.

Islom sivilizatsiyasi markazida ishtirokchilar xalqimizning boy tarixiy, ilmiy va ma’naviy merosi, buyuk ajdodlarimizning jahon ilm-fani va sivilizatsiyasi rivojiga qo‘shgan beqiyos hissasi bilan yaqindan tanishdilar. Markazdagi tarixiy artefaktlar, zamonaviy multimedia vositalari, virtual ko‘rgazmalar, tematik installyatsiyalar va interaktiv ekspozitsiyalar tashrif ishtirokchilarida katta taassurot qoldirdi.

Shundan so‘ng BuxDU jamoasi G‘alaba bog‘idagi “Shon-sharaf” davlat muzeyida bo‘ldi. Bu yerda Ikkinchi jahon urushi yillarida O‘zbekiston xalqining ko‘rsatgan jasorati, front va front ortidagi fidokorona mehnati hamda Vatan himoyasi yo‘lidagi matonatini aks ettiruvchi tarixiy hujjatlar, fotosuratlar, shaxsiy buyumlar, harbiy texnika va boshqa noyob eksponatlar bilan tanishildi.

Ma’rifiy sayohat Qatag‘on qurbonlari xotirasi muzeyida davom etdi. Tashrif davomida talabalar va pedagog-xodimlar xalqimiz tarixining murakkab va sinovli davrlari, qatag‘on siyosati oqibatlari hamda millat ravnaqi, ilm-fan va ma’rifat yo‘lida fidoyilik ko‘rsatgan ajdodlarimizning hayoti va faoliyatiga oid ekspozitsiyalar bilan yaqindan tanishdilar.

Mazkur sayohat nafaqat tarixiy va madaniy merosimizni chuqurroq anglash, balki yoshlarning tarixiy xotirasini mustahkamlash, milliy qadriyatlarga hurmat, Vatanga muhabbat va daxldorlik tuyg‘ularini yuksaltirishga xizmat qilgani bilan ham ahamiyatli bo‘ldi.

Buxoro davlat universitetida “Dolzarb 90 kun” dasturi doirasida talaba-yoshlar va pedagog-xodimlarning bo‘sh vaqtini mazmunli tashkil etish, ularning ma’naviy-ma’rifiy dunyoqarashini boyitishga qaratilgan tashabbuslar izchil davom ettirilmoqda.


BuxDU Axborot xizmati.