02.07.2026

“Siz hech qachon, hech kimdan kam bo‘lmaysiz.”
— O‘zbekiston Respublikasi Prezidenti Shavkat Mirziyoyev

Yangi O‘zbekistonda inson qadri, yoshlar manfaatlari va inklyuziv ta’limni ta’minlash davlat siyosatining ustuvor yo‘nalishlaridan biriga aylangan. Prezidentimiz Shavkat Mirziyoyevning “Siz hech qachon, hech kimdan kam bo‘lmaysiz” degan ezgu g‘oyasi bugun minglab yoshlar hayotida amaliy ifodasini topmoqda.

Yoshlar kuni munosabati bilan Olimpiya shaharchasida tashkil etilgan maxsus ko‘rgazmada Prezidentimiz faol, tashabbuskor va izlanuvchan yoshlar bilan uchrashdi. Uchrashuv davomida Buxoro viloyati Vobkent tumanida istiqomat qiluvchi Chinora G‘ulomovaning hayot yo‘li va amalga oshirayotgan ezgu ishlari davlatimiz rahbari e’tiboriga havola etildi.

Jismoniy imkoniyati cheklangan bo‘lishiga qaramay, Chinora G‘ulomova uyda ta’lim olayotgan bolalar uchun “O‘qi va yuksal” loyihasini amalga oshirib, ularning bilim olishi, o‘ziga bo‘lgan ishonchini mustahkamlash va jamiyatda munosib o‘rin egallashiga ko‘maklashib kelmoqda. Uning fidoyiligi va yuksak ijtimoiy mas’uliyati Prezidentimiz tomonidan munosib e’tirof etilib, “Kelajak bunyodkori” medali bilan taqdirlash to‘g‘risida topshiriq berildi.

Mazkur ezgu e’tiborning mantiqiy davomi sifatida Buxoro shahrida “Yoshlar kuni” munosabati bilan o‘tkazilgan tantanali bayram tadbirida Chinora G‘ulomovaga Buxoro davlat universitetida davlat granti asosida tahsil olish huquqini beruvchi maxsus sertifikat tantanali ravishda topshirildi.

Endilikda Chinora G‘ulomova Buxoro davlat universitetining “Psixologiya” ta’lim yo‘nalishida imtiyozli ravishda, to‘liq davlat granti asosida tahsil oladi.

Bu nafaqat bir yoshning orzusi ushalgani, balki Yangi O‘zbekistonda iste’dod, matonat va ezgu maqsad yo‘lida intilgan har bir inson doimo qo‘llab-quvvatlanishining yana bir yorqin isbotidir. Chinoraning hayot yo‘li shuni ko‘rsatadiki, chinakam iroda, bilimga intilish va ezgulik sari xizmat qilish har qanday to‘siqni yengishga qodir.

Buxoro davlat universiteti jamoasi Chinora G‘ulomovani universitetimizning katta oilasiga samimiy qutlaydi. Ishonamizki, uning bilim olishga bo‘lgan intilishi, mustahkam irodasi va insonparvarlik fazilatlari kelgusida ham yurtimiz ravnaqiga munosib hissa qo‘shadigan yetuk mutaxassis sifatida kamol topishiga xizmat qiladi.

Chinora G‘ulomovaga talabalik hayotida ulkan muvaffaqiyatlar, ilmiy izlanishlarida yuksak marralar va porloq kelajak tilaymiz!

BuxDU Axborot xizmati