27.06.2026

Buxoro davlat universiteti rektori, professor Obidjon Xamidov ishtirokida 2026/2027-o‘quv yili qabuli hamda kasbiy (ijodiy) imtihonlarni tashkil etish masalalariga bag‘ishlangan matbuot anjumani bo‘lib o‘tdi. Tadbirda viloyatdagi jurnalistlar, blogerlar hamda OAV vakillari ishtirok etishdi.


Anjuman davomida universitetning o‘quv-uslubiy departamenti boshlig‘i Suxrob Davlatov yangi o‘quv yili uchun belgilangan qabul parametrlari, ta’lim yo‘nalishlari va hujjat topshirish tartibi bo‘yicha batafsil ma’lumot berdi. Ayniqsa, joriy yilda kasbiy (ijodiy) imtihonlarni ochiqlik, shaffoflik va adolat tamoyillari asosida o‘tkazish, abituriyentlar hamda ularning ota-onalari uchun qulay shart-sharoitlar yaratish masalalariga alohida e’tibor qaratildi.

Rektor Obidjon Xamidov o‘z nutqida qabul jarayonida jamoatchilik nazoratini ta’minlash oliygohning ustuvor vazifasi ekanini ta’kidladi:

“Bizning asosiy maqsadimiz — har bir abituriyentning bilimini xolis baholash va jarayonlarning to‘liq shaffofligini ta’minlashdir. Bu yo‘lda ommaviy axborot vositalari bilan hamkorligimiz keng jamoatchilikda ishonchni mustahkamlashga xizmat qiladi”, — dedi BuxDU rektori.

Tadbir yakunida universitet faoliyati, tizimdagi islohotlar hamda qabul jarayonlarini keng jamoatchilikka xolis va tezkor yoritishda munosib hissa qo‘shib kelayotgan bir guruh jurnalist va blogerlar tantanali ravishda taqdirlandilar. Faol hamkorlarga universitet rahbariyati nomidan tashakkurnomalar va esdalik sovg‘alari topshirildi. Mazkur muloqot maydoni oliy ta’limdagi yangiliklarni xalqqa yetkazishda muhim poydevor bo‘lib xizmat qiladi.

BuxDU Axborot xizmati