25.05.2026

Prezidentimiz tomonidan mamlakatimizda sportni rivojlantirish, sog‘lom turmush tarzini keng targ‘ib qilish hamda iqtidorli yoshlarni har tomonlama qo‘llab-quvvatlashga alohida e’tibor qaratilmoqda. Xususan, yosh sportchilarni xalqaro maydonlarga tayyorlash, ularning salohiyatini ro‘yobga chiqarish va sport infratuzilmasini yanada rivojlantirish borasida amalga oshirilayotgan islohotlar o‘zining amaliy natijalarini bermoqda. Bunday e’tibor natijasida talaba-yoshlar xalqaro sport musobaqalarida yuksak natijalarni qayd etib, yurtimiz bayrog‘ini baland ko‘tarmoqda.

Buxoro davlat universiteti talabalari xalqaro sport maydonlarida O‘zbekiston sharafini munosib himoya qilib, navbatdagi yirik yutuqlarga erishdi.

Nufuzli Osiyo chempionatlari doirasida universitet sportchilari quyidagi natijalarni qayd etdi:

– Sevara Sadullayeva – Toshkent shahrida o‘tkazilgan aralash jang san’atlari (MMA) bo‘yicha Osiyo chempionatida g‘oliblikni qo‘lga kiritib, Osiyo chempioni bo‘ldi hamda Osiyo o‘yinlariga yo‘llanma oldi;

– Rahimjon Uzokov – Vyetnamning Da Nang shahrida o‘tkazilgan U23 Osiyo chempionatining erkin kurash bahslarida barcha raqiblarini mag‘lub etib, Osiyo chempioni bo‘ldi;

– Shakhzodbek Yarashev – Vyetnamning Da Nang shahrida o‘tkazilgan U23 Osiyo chempionatida erkin kurash bo‘yicha 70 kg vazn toifasida muvaffaqiyatli ishtirok etib, bronza medalini qo‘lga kiritdi.

Mazkur yutuqlar oliy ta’lim muassasalarida sportni rivojlantirish, iqtidorli yoshlarni qo‘llab-quvvatlash hamda talaba-yoshlarning xalqaro maydondagi raqobatbardoshligini oshirish borasida olib borilayotgan tizimli ishlarning amaliy natijasidir.

Sportchi talabalarimizni ushbu yuksak natijalar bilan samimiy muborakbod etamiz hamda kelgusi musobaqalarda ularga yangi zafarlar tilaymiz.

BuxDU Axborot xizmati