16.04.2026

Buxoro davlat universiteti rektori O. Xamidov ayni kunlarda xizmat safari bilan Turkiyaning Anqara shahrida bo‘lib turibdi. Safar doirasida Turkiyaning yetakchi oliy ta’lim muassasalari, davlat idoralari va xalqaro tashkilotlar rahbariyati bilan uchrashuvlar o‘tkazilib, o‘zaro manfaatli hamkorlikning ustuvor yo‘nalishlari yuzasidan muzokaralar olib borilmoqda.

O. Xamidov Haji Bayram Veli universiteti rektori Mehmet Naji Bostanji bilan rasmiy uchrashuv o‘tkazdi. Uchrashuv yakunida Buxoro davlat universiteti va Haji Bayram Veli universiteti o‘rtasida hamkorlik to‘g‘risidagi kelishuv imzolandi. Mazkur hujjat akademik almashinuv dasturlari, qo‘shma ilmiy tadqiqotlar va nashrlar, talabalar hamda professor-o‘qituvchilar mobilligini yo‘lga qo‘yish, shuningdek, madaniy va ilmiy tadbirlarni birgalikda tashkil etish yo‘nalishlarida hamkorlikni kengaytirishga xizmat qiladi.

Shuningdek, O. Xamidov Turkiya Respublikasi Madaniyat va turizm vazirligi, Haji Bayram Veli universiteti, Turkiya xalqaro hamkorlik va muvofiqlashtirish agentligi (TIKA), Yunus Emre instituti hamda Xorijdagi turklar va qardosh jamiyatlar tashkiloti hamkorligida tashkil etilgan “7-Xalqaro sayohat va turizm dinamikasi” kongressida ishtirok etdi. Mazkur kongressning plenar sessiyasida u O‘zbekistonning turizm salohiyati haqida ma’ruza qildi. Ushbu taqdimot vazirlar, elchilar, rektorlar hamda boshqa yuqori martabali mehmonlar tomonidan katta qiziqish bilan kutib olindi.

Xizmat safari davomida rektor O. Xamidov Turkiya Respublikasi Madaniyat va turizm vaziri o‘rinbosari, doktor Serdar Cham bilan ham rasmiy uchrashuv o‘tkazdi. Uchrashuvda vazir o‘rinbosarining maslahatchisi, ilgari TIKAning O‘zbekistondagi vakolatxonasiga rahbarlik qilgan Ali Ihsan Chag‘lar ham ishtirok etdi. Muloqot davomida ta’lim va fan sohasidagi hamkorlikni yanada rivojlantirish, qo‘shma loyihalarni amalga oshirish hamda grant mablag‘larini jalb etish imkoniyatlari yuzasidan atroflicha fikr almashildi.

Tomonlar o‘zaro manfaatli aloqalarni mustahkamlash, istiqboldagi hamkorlik yo‘nalishlarini kengaytirish hamda ta’lim, ilm-fan va madaniyat sohalarida qo‘shma tashabbuslarni qo‘llab-quvvatlash borasida kelishuvga erishdilar.

Shuningdek, xizmat safari dasturidan Yaqin Sharq texnika universiteti (METU), Anqara universiteti kabi nufuzli oliy ta’lim muassasalari rahbariyati bilan muzokaralar o‘tkazish, shuningdek, O‘zbekiston Respublikasining Anqaradagi elchixonasida qator uchrashuvlarda ishtirok etish ham o‘rin olgan.

Mazkur xizmat safari Buxoro davlat universitetining xalqaro aloqalarini yanada kengaytirish, ilmiy va ta’lim sohasidagi hamkorlikni yangi bosqichga olib chiqish, shuningdek, universitetning xalqaro maydondagi nufuzini mustahkamlashda muhim ahamiyat kasb etadi.