17.06.2026

Malayziyaning nufuzli oliy ta’lim muassasalaridan biri — Sultan Idris Education University katta o‘qituvchisi Zuraini Binti Ramlining Buxoro davlat universitetidagi uch oylik akademik faoliyati va taassurotlari aks etgan ushbu maqola ikki universitet o‘rtasidagi samarali xalqaro hamkorlik, madaniy muloqot hamda ta’lim sohasidagi o‘zaro tajriba almashinuvining yorqin namunasi hisoblanadi. Muallif o‘z kuzatuvlari orqali Buxoro davlat universitetining ilmiy salohiyati, xalqaro muhiti va O‘zbekistonning boy madaniy merosi haqida samimiy fikr-mulohazalarini bayon etadi.

"2026-yil 10-martdan 31-mayga qadar Buxoro davlat universitetida amalga oshirilgan uch oylik akademik tashrifim nafaqat ta’lim jarayonlari bilan tanishish, balki O‘zbekistonning boy madaniy merosi, ilmiy muhiti va xalqaro hamkorlik salohiyatini yaqindan o‘rganish imkonini berdi.
 

Mazkur tashrif Malayziyaning Sultan Idris ta’lim universiteti (UPSI) tomonidan amalga oshirilayotgan xalqaro hamkorlik va malay tilini dunyo miqyosida targ‘ib qilish tashabbuslari doirasida tashkil etildi.
 

Tashrif davomida BuxDU rektori professor Obidjon Xamidov bilan uchrashuv, fakultetlar rahbariyati, professor-o‘qituvchilar va talabalar bilan muloqotlar, xalqaro ilmiy konferensiyalar va forumlardagi ishtirok samarali akademik hamkorlik uchun mustahkam zamin yaratdi.
 

Xususan, Chet tillar fakulteti dekani dotsent Nozimjon Ataboyev bilan bo‘lib o‘tgan uchrashuvlarda UPSI va BuxDU o‘rtasidagi istiqboldagi ilmiy, ta’limiy va tadqiqot hamkorligi masalalari muhokama qilindi.
 

Safarning eng muhim jihatlaridan biri “O‘zbekistonda turizm uchun malay tili” dasturi doirasidagi pedagogik faoliyat bo‘ldi. Dasturda turizm va mehmondo‘stlik, ingliz tili va tarjimashunoslik yo‘nalishlari talabalari hamda Buxoroda faoliyat yuritayotgan gidlar qatnashdilar.
 

Shuningdek, “XXI asrda madaniy xilma-xillik va ekologik barqarorlikni uyg‘unlashtirish” mavzusidagi xalqaro konferensiya hamda Ikkinchi Osiyo ayollar forumida ishtirok etish xalqaro akademik tarmoqlarni kengaytirish imkonini berdi.
 

Navro‘z bayramidagi ishtirok esa O‘zbekiston xalqining milliy qadriyatlari, hamjihatligi va madaniy merosiga bo‘lgan hurmatini chuqurroq anglashga xizmat qildi.

BuxDU Xalqaro hamkorlik bo‘limi rahbari Shohabbos Sharofiddinov hamda uning jamoasi, shuningdek Grand Bukhara mehmonxonasi xodimlariga ko‘rsatilgan samimiy mehmondo‘stlik uchun alohida minnatdorlik bildiraman. So'zim yakunida Buxoro shahrida malay tilini o‘qitish dasturini davom ettirish, UPSI va BuxDU o‘rtasidagi hamkorlikni kengaytirish hamda Malayziya va O‘zbekiston o‘rtasidagi madaniy-gumanitar aloqalarni yanada mustahkamlash zarur deb o'ylayman."

Professor Zuraini Binti Ramlining ushbu samimiy taassurotlari Buxoro davlat universitetining xalqaro maydondagi nufuzi, ochiq akademik muhiti va boy madaniy merosga ega yurtimizning jozibasini yana bir bor namoyon etadi. Universitet jamoasi muallifga iliq fikrlari va hamkorlikka bo‘lgan yuksak e’tibori uchun minnatdorlik bildirib, UPSI bilan o‘zaro manfaatli aloqalar kelgusida ham yangi bosqichlarda davom etishiga ishonch bildiradi.