28.03.2026

O‘zbekiston Respublikasi Prezidenti tomonidan belgilab berilgan ustuvor vazifalar ijrosi doirasida Buxoro davlat universitetida “Rektor yotoqxonada — bir kun, bir tun” tashabbusi asosida talabalar turar joyida keng qamrovli uchrashuv va o‘rganish ishlari olib borildi.

Mazkur tashrif davomida BuxDU rektori Obidjon Xamidov talabalar bilan ochiq va samimiy muloqot o‘tkazib, ularning yashash sharoitlari, kundalik ehtiyojlari hamda ta’lim jarayoniga oid fikr-mulohazalarini atroflicha o‘rgandi.

Uchrashuvlar davomida quyidagi masalalar muhokama qilindi va amaliy ishlar olib borildi:
— talabalar turar joyidagi yashash sharoitlari, infratuzilma, tozalik va qulayliklarni yanada yaxshilash;
— internet sifati, o‘quv xonalari va mustaqil ta’lim olish uchun yaratilgan sharoitlarni takomillashtirish;
— talabalarni ingliz tili, IT va sun’iy intellekt yo‘nalishlaridagi o‘quv kurslariga keng jalb etish, jumladan “Besh million sun’iy intellekt yetakchilari” dasturida faol ishtirokini qo‘llab-quvvatlash;
— kitobxonlik madaniyatini rivojlantirish, “kitob burchaklari” va intellektual muhitni kuchaytirish;
— talabalarning bo‘sh vaqtini mazmunli tashkil etish maqsadida sport (shaxmat, shashka, stol tennisi, mini futbol) hamda ijodiy to‘garaklar faoliyatini kengaytirish;
— “Rektor kubogi” sport musobaqalari va turli ma’naviy-ma’rifiy loyihalarni yo‘lga qo‘yish;
— iqtidorli talabalarni qo‘llab-quvvatlash, startap va tashabbuslarini rag‘batlantirish;
— psixologik qo‘llab-quvvatlash va xavfsizlik masalalariga alohida e’tibor qaratish.

Shuningdek, rektor tashrif davomida ingliz tili darslarida ishtirok etib, o‘quv jarayonini bevosita kuzatdi hamda talabalar bilan muloqot olib bordi.

Besh muhim tashabbus doirasida tashkil etilgan xonalar, jumladan musiqa, kitobxonlik va sport yo‘nalishlaridagi faoliyatlar bilan tanishilib, talabalar bilan samimiy suhbatlar o‘tkazildi.

Bundan tashqari, xalqaro darajadagi tadbirlarda, xususan O‘zbekiston va Tojikiston Respublikasi Prezidentlari tashrifida faol qatnashgan talabalar bilan uchrashuv tashkil etilib, ularning tajribalari va taassurotlari tinglandi.

Mazkur tashabbus doirasida olib borilgan ishlar talaba-yoshlarning muammolarini joyida hal etish, ularning intellektual va ijodiy salohiyatini rivojlantirish hamda universitetda sog‘lom va zamonaviy muhitni shakllantirishga xizmat qilmoqda.