Buxoro davlat universitetida oliy ta’limning xalqaro jozibadorligini oshirish hamda turizm sohasiga Yevropa ta’lim standartlarini joriy etish maqsadida Avstriyaning nufuzli IMC Krems amaliy fanlar universiteti (IMC University of Applied Sciences Krems) delegatsiyasi bilan rasmiy uchrashuv bo‘lib o‘tdi.
Uchrashuvda universitet rektori, professor Obidjon Xamidov boshchiligidagi oliygoh rahbariyati hamda avstriyalik yuqori martabali mehmonlar — IMC Krems universiteti Kuzatuv kengashi raisi Xayns Boyer va bosh ijrochi direktor Udo Brendl ishtirok etdilar. Tomonlar o‘rtasida konstruktiv va samarali muloqot olib borildi.
Muzokaralar davomida Buxoro davlat universiteti negizida turizm yo‘nalishi bo‘yicha qo‘shma fakultet tashkil etish, xalqaro qo‘shma ta’lim dasturlarini yo‘lga qo‘yish hamda o‘zaro manfaatli akademik hamkorlikni rivojlantirish masalalari atroflicha muhokama qilindi. Shuningdek, Buxoroning boy tarixiy-meros va mintaqaviy turizm salohiyatini inobatga olgan holda, zamonaviy kadrlar tayyorlash, o‘quv rejalarini muvofiqlashtirish yuzasidan fikr almashildi.
Uchrashuvning amaliy davomi sifatida delegatsiya a’zolari Buxoro Turizm va madaniy meros texnikumi faoliyati bilan tanishdilar. Bundan tashqari, xalqaro ekspertlar shaharda barpo etilayotgan zamonaviy mehmonxonalarga tashrif buyurib, mavjud infratuzilma va servis imkoniyatlarini o‘rgandilar.
Mazkur tashrifdan ko‘zlangan asosiy maqsad — ta’lim va amaliyot uyg‘unligini ta’minlovchi “Dual ta’lim” (Dual Education) tizimini joriy etishdir. Ushbu tizim orqali talabalar nazariy bilimlarni universitetda, amaliy ko‘nikmalarni esa bevosita mehmonxona va turistik majmualarda egallash imkoniyatiga ega bo‘ladilar.
