Toshkent shahrida QS Quacquarelli Symonds tomonidan Central Asian University mezbonligida, O‘zbekiston Respublikasi Oliy ta’lim, fan va innovatsiyalar vazirligi ko‘magida tashkil etilgan QS Eurasia Forum 2025 bo‘lib o‘tdi. Forumda Yevropa va Markaziy Osiyodagi yetakchi oliygohlar, ilmiy markazlar va ta’lim sohasi ekspertlari ishtirok etdi.
Buxoro davlat universiteti delegatsiyasi tarkibida:
Rektor Obidjon Xamidov,
Xalqaro reytinglar bilan ishlash sektori bosh mutaxassisi Shohrux Ibadullayev,
Amaliy matematika va dasturlash texnologiyalari kafedrasi o‘qituvchisi Robiya Farmonova
forumning asosiy sessiyalarida qatnashdi.
Tadbir davomida oliy ta’limni xalqaro standartlarga mos rivojlantirish, reyting indikatorlari bo‘yicha ilg‘or tajribalar, transchegaraviy hamkorlik, ilmiy tadqiqotlar va innovatsion loyihalarni qo‘llab-quvvatlash masalalari atroflicha muhokama qilindi.
Forum doirasida BuxDU rektori qator nufuzli oliygohlar rahbarlari bilan uchrashuvlar o‘tkazdi:
QS asoschisi Nunzio Quacquarelli bilan uchrashuv — xalqaro reytinglarda BuxDUning mavqeini oshirish va indikatorlar bo‘yicha hamkorlik masalalari ko‘rib chiqildi.
Boku davlat universiteti rektori Elchin Babayev bilan uchrashuv — qo‘shma ilmiy loyihalar, almashinuv dasturlari va akademik hamkorlikni kengaytirish yuzasidan kelishuvga erishildi.
George Washington University vakili Jeffrey Hunter bilan uchrashuv — magistratura ta’limidagi global yondashuvlar, qo‘shma dasturlar, talabalar almashinuvi va xalqaro integratsiyaga oid masalalar muhokama qilindi.
QS Eurasia Forum 2025 BuxDU uchun xalqaro hamkorliklarni kengaytirish, global ta’lim maydoniga integratsiyani jadallashtirish va universitetning xalqaro nufuzini yanada oshirishda muhim voqea bo‘ldi.
