Buxoro davlat universitetida muhim xalqaro uchrashuv bo‘lib o‘tdi. Misr Arab Respublikasining O‘zbekiston Respublikasidagi Favqulodda va Muxtor Elchisi Tamer Hammad hamda elchixona maslahatchisi Hanan Bashary universitetga tashrif buyurdilar. Tashrifning maqsadi O‘zbekiston va Misr o‘rtasidagi ta’limiy, ilmiy va madaniy hamkorlik aloqalarini kengaytirish, qo‘shma loyihalar, o‘qituvchi va talabalar almashinuv dasturlarini yo‘lga qo‘yishdan iborat bo‘ldi.
Uchrashuvda BuxDU rektori, iqtisodiyot fanlari doktori, professor Obidjon Xamidov boshchiligidagi universitet vakillari, jumladan, xalqaro hamkorlik bo‘yicha prorektori Abror Jo’rayev, tarix va yuridik fakulteti dekani Bobir Namozov, “Al-Azhar” universiteti professori Ayman Usmon hamda qator mas'ullar ishtirok etishdi. Uchrashuv davomida BuxDUda amalga oshirilayotgan xalqaro hamkorlik loyihalari, xorijiy oliygohlar bilan tuzilgan memorandumlar hamda xorijiy talabalar uchun yaratilgan sharoitlar haqida ma’lumot berildi. Muloqot chog‘ida tomonlar Misr oliy ta’lim muassasalari bilan akademik almashinuv dasturlarini joriy etish, ilmiy tadqiqotlarda hamkorlikni kuchaytirish masalalarini muhokama qildilar.
Elchi Tamer Hammad Buxoro davlat universitetining xalqaro miqyosdagi salohiyatini yuqori baholab, Misrning yirik universitetlari bilan o‘zaro aloqalarni yo‘lga qo‘yish, madaniyat va ta’lim sohalarida qo‘shma tashabbuslarni amalga oshirish istagini bildirdi. Mazkur tashrif BuxDUning xalqaro hamkorlik sohasidagi faoliyatida yana bir muhim bosqich bo‘lib, O‘zbekiston va Misr o‘rtasida ta’lim, fan va madaniyat yo‘nalishlaridagi aloqalarni yanada mustahkamlashga xizmat qiladi.
