Buxoro davlat universiteti rektori Obidjon Xamidov boshchiligidagi jamoa Toshkent shahridagi “Qatag‘on qurbonlari” xotira muzeyiga tashrif buyurdi. Mazkur tashrif davomida o‘tgan asrning fojiali sahifalari, xalqimiz boshiga tushgan og‘ir qatag‘on yillari, minglab begunoh vatandoshlarimizning fojiali taqdiri xotirlandi. Xususan, o‘sha davrda zulm va ta’qib qurboniga aylangan buxorolik ma’rifatparvarlar, ziyolilar va vatanparvar insonlar yodi alohida ehtirom bilan esga olindi.
Universitet jamoasi muzeydagi ekspozitsiyalar, tarixiy hujjatlar va eksponatlar orqali o‘sha davr voqealarini chuqur his etib, mustaqillik va erkinlik ne’matining qadrini yanada anglab yetdilar. Buxoro davlat universiteti vakillari bunday tashriflar yosh avlod qalbida tarixiy xotirani saqlash, milliy o‘zlikni asrab-avaylash va mustaqillik g‘oyalariga sadoqatni kuchaytirishda muhim ahamiyat kasb etishini ta’kidladilar.
