Bugun O‘zbekiston Respublikasi Oliy ta’lim, fan va innovatsiyalar vaziri o‘rinbosari Otabek Mahkamov Buxoro davlat universitetida bo'lib, universitet faoliyati bilan batafsil tanishdi. Jumladan, 2025/2026-o‘quv yili uchun Buxoro davlat universitetida amalga oshirilayotgan tayyorgarlik jarayonlarini ko'zdan kechirdi.
Buxoro davlat universitetining xalqaro reytinglardagi tutgan o'rni ko'tarilishi barobarida nufuzi ham oshib borayotgani ta'kidlandi.
Shu bilan birga, vazir o'rinbosari Otabek Mahkamov “Dolzarb 90 kun” doirasidagi ishlar bilan tanishdi. U universitetda olib borilayotgan tizimli chora-tadbirlar, talabalar uchun yaratilgan shart-sharoitlar hamda loyihaning talaba-yoshlar hayotidagi samarasini ko‘zdan kechirdi. Xususan, u ko‘rgazmalar, innovatsion loyihalar taqdimoti, robototexnika markazi, talabalar uchun xizmat ko'rsatayotgan "Ofis-registrator" markazi faoliyati bilan yaqindan tanishdi. Ushbu xizmat — talabalar murojaatlarini tezkor va shaffof tartibda hal etish, ularning huquqiy va ma’muriy ehtiyojlariga amaliy yordam ko‘rsatish yo‘lida yangi bosqich ekanini alohida e’tirof etdi.
Tashrif davomida Buxoro viloyatidagi oliy ta'lim muassasalari rektorlari bilan yig'ilish o'tkazilib, bir qator masalalar muhokama qilindi. Jumladan, "Kelajakka qadam" loyihasi doirasida ishlarni jadallashtirish hamda hududlarni ijtimoiy-iqtisodiy rivojlantirish borasida aniq vazifalar belgilab olindi.
