Qozon federal universitetida 45.04.01 – Filologiya yo‘nalishi bo‘yicha magistrlik dissertatsiyalarining himoyasi boshlandi. Ta’lim yo‘nalishi: “Chet tili sifatida rus tili (elektron ta’lim va masofaviy ta’lim texnologiyalari asosida)”. Dastur Buxoro davlat universiteti va Qozon federal universitetining Filologiya va madaniyatlararo aloqalar instituti o‘rtasidagi qo‘shma diplomli ta’lim dasturi doirasida amalga oshirilmoqda.
1-iyuldan 3-iyulgacha O‘zbekistondan kelgan magistrantlar o‘z ilmiy ishlarini attestasiyaviy komissiya oldida taqdim etmoqdalar. Komissiya tarkibiga Qozon federal universiteti Filologiya instituti vakillari hamda BuxDU Rus tili va adabiyoti kafedrasi dotsenti F. R. Murtazayeva kirgan. Ushbu jarayon ikki yillik tinimsiz, ammo ilhomlantiruvchi mehnatning mantiqiy yakunidir. U nafaqat talabalarning ilmiy salohiyatini namoyon etdi, balki xalqaro hamkorlikni mustahkamlash va akademik mobillikni rivojlantirishda ham muhim qadamlardan biri bo‘ldi.
Magistrlik dissertatsiyalari adabiy manbalarni qiyosiy tahlil qilish, tillararo kommunikatsiya, tarjima nazariyasi va milliy o‘zlikning filologik talqini kabi mavzularni qamrab oldi. Talabalar ilmiy metodologiyani puxta egallaganliklari, dolzarb filologik muammolarni chuqur tahlil qilish qobiliyatlari va nazariy bilimlarni amaliy tadqiqotlar bilan uyg‘unlashtira olganliklarini namoyish etdilar.
Qozon federal universiteti va BuxDU o‘rtasidagi qo‘shma magistratura dasturi nafaqat ikki diplom olish imkonini, balki ikki tomonlama tajriba orttirish, turli ilmiy maktablar bilan tanishish, dunyoqarashni kengaytirish va ilmiy-madaniy aloqalarni mustahkamlash imkonini beradi. Bu nafaqat shaxsiy rivojlanish, balki davlatlararo gumanitar hamkorlikka qo‘yilgan sarmoyadir.
