Bugun universitet rektori O.Xamidovning O‘zbekiston-Yaponiya markazi milliy koordinatori Ulug‘bek Azamov hamda markazning Yaponiya tomonidan rahbari Yoshiaki Noguchi bilan uchrashuvi o‘tkazildi.
O‘zbekiston-Yaponiya markazi uzoq yillardan beri biznes-kurslar, yapon tili va madaniyati kurslari va boshqa tadbirlarni tashkil qilib keladi. Markazning O‘zbekistondagi yagona filiali Buxoro davlat universiteti bazasida joylashgan bo‘lib, 2007 yildan beri faoliyat ko‘rsatmoqda.
Uchrashuvda kelgusi hamkorlik imkoniyatlari muhokama qilindi.
Shu jumladan:
Markazning asosiy yo‘nalishlaridan biri bo‘lgan biznes-kurslar, xususan loyiha boshqaruvi (Project Management) kurslarini Buxoro va qo‘shni viloyatlar uchun BuxDU bazasida yo‘lga qo‘yish, bu orqali hududdagi tadbirkorlik faoliyatini rivojlantirish, biznes yuritishda yapon tajribasini joriy qilish tashabbusi bo‘yicha fikr almashildi;
Rektor O.Xamidov tomonidan Buxoro viloyatida yapon arxeologlari bilan qo‘shma ilmiy tadqiqotlar olib borish taklifi bildirildi;
Kambag‘allikni qisqartirish yo‘nalishida yapon universitetlari bilan hamkorlik qilish, xususan Yamagata universiteti takliflarini viloyatdagi banklar tomonidan ajratilayotgan mablag‘lar doirasida qo‘llash borasida hamfikrlikka erishildi;
Turizm sohasini rivojlantirishga hissa qo‘shish maqsadida yapon turisti profili, yaponiyaliklar uchun qiziqish uyg‘otadigan turistik paketlar xususiyati bo‘yicha ilmiy tadqiqotlar olib borishga kelishildi;
Joriy yilning noyabr oyida o‘tkazilishi mo‘ljallangan Yaponiya taʼlim ko‘rgazmasini o‘tkazishda hamkorlik qilish rejaga kiritildi.
Ushbu uchrashuv universitetimiz va O‘zbekiston-Yaponiya markazining hamkorligi yanada rivojlanishiga turtki bo‘lib xizmat qilishi shubhasizdir.
