12.10.2026

2026-yil 12-oktabr kuni Ozarbayjon Respublikasining O‘zbekiston Respublikasidagi Favqulodda va Muxtor elchisi, doktor Rashad Mammadov boshchiligidagi delegatsiya Buxoro davlat universitetiga tashrif buyurdi. Tashrif doirasida universitet rektori, professor Obidjon Xamidov bilan uchrashuv hamda “Ozarbayjon–O‘zbekiston tarixiy-madaniy aloqalari” mavzusida seminar tashkil etildi.

Mazkur tadbirlar 11–13-oktabr kunlari Buxoro shahrida o‘tkazilayotgan “Ozarbayjon madaniyati va san’ati kunlari” doirasida tashkil etilib, ikki qardosh mamlakat o‘rtasidagi strategik sheriklik munosabatlarini mustahkamlash, ilmiy-akademik hamkorlikni kengaytirish hamda mushtarak tarixiy-madaniy merosni targ‘ib etishga qaratildi.

Tashrif avvalida Ozarbayjon elchisi doktor Rashad Mammadov Buxoro davlat universiteti rektori, professor Obidjon Xamidov bilan uchrashdi. Muloqot davomida ikki mamlakat oliy ta’lim muassasalari o‘rtasidagi hamkorlikni rivojlantirish, qo‘shma ilmiy tadqiqotlarni amalga oshirish, xalqaro konferensiyalar tashkil etish, professor-o‘qituvchilar va talabalar akademik mobilligini kengaytirish kabi masalalar yuzasidan fikr almashildi.

Shundan so‘ng universitet rahbariyati, professor-o‘qituvchilari hamda tarix, xalqaro munosabatlar, filologiya va boshqa ta’lim yo‘nalishlari talabalari ishtirokida “Ozarbayjon–O‘zbekiston tarixiy-madaniy aloqalari” mavzusidagi seminar-uchrashuv bo‘lib o‘tdi.
Seminarni Buxoro davlat universiteti rektori, professor Obidjon Xamidov kirish so‘zi bilan ochib, elchi va delegatsiya a’zolarini qadimiy Buxoro zaminida samimiy qutladi.

Rektor Buxoroda ilk bor Ozarbayjon madaniyati va san’ati kunlari tashkil etilayotganidan mamnunligini bildirib, ushbu tashabbus ikki xalq o‘rtasidagi azaliy do‘stlik, tarixiy yaqinlik va mushtarak madaniy qadriyatlarning yorqin ifodasi ekanini ta’kidladi.

O‘z nutqida professor Obidjon Xamidov O‘zbekiston va Ozarbayjon o‘rtasidagi strategik sheriklik munosabatlari, ikki tomonlama hamkorlikning bugungi rivojlanish bosqichi hamda istiqboldagi ustuvor yo‘nalishlariga alohida to‘xtaldi. Xususan, ta’lim, ilm-fan, madaniyat va innovatsiyalar sohalarida o‘zaro manfaatli aloqalarni yanada rivojlantirish, universitetlar o‘rtasida qo‘shma ilmiy loyihalarni amalga oshirish hamda akademik almashinuv dasturlarini kengaytirish muhimligini qayd etdi.

Shuningdek, buxorolik talaba-yoshlarning Ozarbayjon oliy ta’lim muassasalarida tahsil olishi, xalqaro ta’lim dasturlarida ishtirok etishi va xorijiy akademik tajribadan foydalanishi uchun mavjud hamda istiqboldagi imkoniyatlar haqida fikr yuritdi.

Rektor 2027-yilda Buxoro shahrida Mustaqil Davlatlar Hamdo‘stligi (MDH) sammiti bo‘lib o‘tishi masalasiga ham to‘xtalib, mazkur xalqaro tadbir Buxoroning xalqaro maydondagi nufuzini yanada oshirish, davlatlar o‘rtasidagi ko‘p tomonlama muloqot va madaniy-gumanitar hamkorlikni kengaytirish uchun muhim imkoniyat yaratishini ta’kidladi.

Shundan so‘ng Ozarbayjon Respublikasining O‘zbekistondagi Favqulodda va Muxtor elchisi, doktor Rashad Mammadov so‘zga chiqdi.
Diplomat Buxoro shahriga tashrifidan mamnunligini bildirib, O‘zbekistonning go‘zal tabiati, boy tarixi, qadimiy shaharlari va bebaho madaniy merosi haqida iliq fikrlarini bildirdi. Xususan, Buxoroning asrlar davomida ilm-fan, ma’rifat va madaniyat markazi sifatida shakllangani, uning jahon sivilizatsiyasi taraqqiyotidagi o‘ziga xos o‘rnini e’tirof etdi.

Elchi o‘z ma’ruzasida talaba-yoshlarga Ozarbayjon Respublikasining geografik joylashuvi, tarixi, davlat va jamiyat hayoti, milliy madaniyati, urf-odatlari hamda boy ilmiy-ma’naviy merosi haqida atroflicha ma’lumot berdi.

Shuningdek, O‘zbekiston va Ozarbayjon xalqlarining mushtarak tarixiy ildizlari, til va madaniyat yaqinligi, turkiy xalqlarga xos umumiy qadriyatlar hamda ikki mamlakat o‘rtasidagi do‘stona munosabatlarning bugungi ahamiyati xususida so‘z yuritdi.

Seminarning savol-javob qismi samimiy va interaktiv ruhda kechdi. BuxDU talabalari Ozarbayjonning oliy ta’lim tizimi, xorijiy talabalar uchun yaratilgan imkoniyatlar, akademik almashinuv dasturlari, diplomatik faoliyat, xalqaro munosabatlar hamda ikki davlat o‘rtasidagi hamkorlik istiqbollari yuzasidan o‘zlarini qiziqtirgan savollar bilan murojaat qildilar.

Doktor Rashad Mammadov talabalarning savollariga batafsil javob berib, ularning xalqaro munosabatlar, tarix va madaniyatga bo‘lgan qiziqishini yuqori baholadi. Muloqot davomida yoshlarning xorijiy tillarni o‘rganishi, xalqaro tajriba orttirishi, ilmiy izlanishlarga intilishi va turli xalqlarning madaniy merosini chuqur anglashining ahamiyati ham muhokama qilindi.

Uchrashuvning yana bir e’tiborli jihati — Ozarbayjon elchisi tomonidan Buxoro davlat universiteti talabalariga o‘zbek tilida nashr etilgan “İRS Miras” jurnalining 2025–2026-yilgi qishki soni taqdim etildi.

“Ozarbayjonni kashf eting” shiori ostida chop etiladigan mazkur nashr tarix, madaniyat va antropologiya yo‘nalishlariga bag‘ishlangan bo‘lib, Ozarbayjonning boy tarixiy-madaniy merosi, milliy qadriyatlari va an’analarini o‘zbek kitobxonlariga tanishtirishga xizmat qiladi.
Jurnalning aynan o‘zbek tilida taqdim etilishi ikki qardosh xalq o‘rtasidagi madaniy-ma’rifiy aloqalar, o‘zaro hurmat va do‘stlik munosabatlarining amaliy ifodasi sifatida alohida ahamiyat kasb etdi.

Ta’kidlash joizki, Ozarbayjon delegatsiyasining Buxoro davlat universitetiga tashrifi doirasidagi tadbirlar 13-oktabr kuni ham davom etadi. Dasturga muvofiq, universitetning Tarix fakultetida XVI–XVII asrlarda yashab ijod qilgan atoqli mutafakkir Yusuf Qorabog‘iy nomidagi Ozarbayjonshunoslik markazining tantanali ochilishi, uning hayoti, ilmiy va ma’naviy merosiga bag‘ishlangan ilmiy konferensiya o‘tkazilishi rejalashtirilgan.

Shuningdek, Buxoro davlat universitetida Haydar Aliyev nomidagi Ozarbayjon madaniyat markazining “Xaribyulbyul” teatr truppasi tomonidan Uzeir Hojibeylining “Arshin mol olon” operettasi namoyishi ham tashrif dasturidan o‘rin olgan.

Ozarbayjon elchisining Buxoro davlat universitetiga tashrifi, universitet rahbariyati bilan o‘tkazilgan uchrashuv va talabalar bilan tashkil etilgan ochiq muloqot ikki mamlakat o‘rtasidagi tarixiy do‘stlik rishtalarini mustahkamlash, ilmiy-akademik hamkorlikni rivojlantirish, madaniy almashinuvni kengaytirish hamda yoshlarning xalqaro dunyoqarashini boyitishda muhim ahamiyat kasb etdi.

BuxDU Axborot xizmati