26.05.2026

Mamlakatimizda turizm sohasini jadal rivojlantirish, xalqaro standartlarga mos kadrlar tayyorlash hamda taʼlim, ilm-fan va amaliyot integratsiyasini kuchaytirishga alohida eʼtibor qaratilmoqda. So‘nggi yillarda turizm infratuzilmasini modernizatsiya qilish, sohaga investitsiyalar jalb etish, xalqaro hamkorlikni kengaytirish va zamonaviy bilim hamda ko‘nikmalarga ega mutaxassislar tayyorlash bo‘yicha keng ko‘lamli islohotlar amalga oshirilmoqda. Bu jarayonlar mamlakatimiz oliy taʼlim muassasalarining xalqaro maydondagi nufuzini ham sezilarli darajada oshirmoqda.

Ayni kunlarda Fransiyaning Nant shahrida turizm va mehmondo‘stlik taʼlimi sohasidagi dunyodagi eng nufuzli tarmoqlardan biri hisoblangan Vatel mehmonxona va turizm biznes-maktabi tarmog‘ining 19-xalqaro VATEL Convention-2026 anjumani bo‘lib o‘tdi.

1981-yilda Fransiyada asos solingan VATEL biznes-maktabi bugungi kunda jahon bo‘ylab 50 dan ortiq kampusga ega bo‘lib, ushbu nuqtai nazardan turizm sohasida jahondagi eng yirik ta’lim muassasalari tarmog‘i hisoblanadi. Nufuzli QS akademik reytingining turizm va mehmondo‘stlik sohasi bo‘yicha Fransiyada 1-o‘rinda, jahonda esa 11-o‘rinda turuvchi biznes-maktab xalqaro miqyosda bir necha bor “Eng yaxshi mehmondo‘stlik maktabi” (Best Hospitality Management School) mukofotiga loyiq ko‘rilgan.

VATEL kampuslaridan biri 2019-yildan beri Buxoro davlat universiteti qoshida ham faoliyat ko‘rsatib kelmoqda. Universitetga Markaziy Osiyo bo‘ylab amal qiluvchi xalqaro franshiza taqdim etilgan bo‘lib, ushbu fakt universitetda turizm va mehmondo‘stlik sohasida yuqori sifatli ta’lim berilishi xalqaro miqyosda tan olinganligining bir belgisidir. Buxoro davlat universitetidagi “Turizm va mehmonxona xo‘jaligi” bakalavriat va magistratura dasturlari Butunjahon Turizm Tashkilotining TedQual xalqaro akkreditatsiyasidan ham o‘tkazilgan. Ta’kidlash joizki, ushbu nufuzli akkreditatsiyaga ega bo‘lgan oliy ta’lim muassasalari soni Markaziy Osiyoda faqatgina 2 tani tashkil etadi.

Buxoro davlat universitetida VATEL bakalavriat va magistratura dasturlarini so‘nggi yillarda bitirganlar soni 106 nafarni tashkil etib, ularning barchasi o‘z sohalari bo‘yicha samarali faoliyat olib borishmoqda. Shuningdek, bugungi kunda 92 nafar talaba tahsil olishda davom etmoqda. VATEL dasturlarining asosiy xususiyati nazariy taʼlimni amaliy tajriba bilan uyg‘unlashtirishga qaratilganligidadir.  Talabalar xalqaro standartlar asosida o‘qib, dunyoning eng yuqori sifatli mehmonxona tarmoqlarida amaliyot o‘taydilar.

VATEL yillik yig‘ilishi (VATEL Convention) esa  butun jahondagi kampuslar rahbarlari, turizm sohasi ekspertlari, xalqaro mehmonxonalar tarmog‘i vakillari va akademik doira vakillarini bir joyga jamlaydigan, global turizm ta’limi trendlari va strategiyalari belgilanadigan eng oliy darajadagi platformadir.

Nant shahrida o‘tkazilgan yig‘ilishda  Buxoro davlat universiteti va mamlakatimiz oliy taʼlim tizimi uchun muhim ahamiyatga ega bo‘lgan yangilik eʼlon qilindi. Mazkur nufuzli xalqaro tadbirning yubiley maqomidagi yigirmanchi 2027-yilda O‘zbekistonda, xususan qadimiy va boqiy Buxoro shahrida Buxoro davlat universiteti hamkorligida o‘tkazilishi maʼlum qilindi. Bu nafaqat Buxoro davlat universitetining xalqaro hamkorlik sohasida erishgan natijalari, balki O‘zbekistonning turizm va taʼlim sohalaridagi islohotlari xalqaro hamjamiyat tomonidan eʼtirof etilayotganining yana bir amaliy tasdig‘idir.

VATEL Conventionning Buxoro shahrida tashkil etilishi nafaqat taʼlim sohasi, balki hudud turizm industriyasi uchun ham katta imkoniyatlar eshigini ochadi. Anjuman davomida dunyoning turli mamlakatlaridan ko‘plab taʼlim menejerlari, ekspertlar, turizm sohasi vakillari va investorlarning Buxoroga tashrif buyurishi kutilmoqda. Bu esa shaharning boy madaniy merosi, turistik salohiyati, mehmonxona infratuzilmasi va xizmat ko‘rsatish imkoniyatlarini xalqaro auditoriyaga namoyish etish imkonini yaratadi.

Shuningdek, mazkur tadbir Buxoroni xalqaro turizm taʼlimi markazlaridan biri sifatida tanitish,  mahalliy turizm va mehmonxona biznesi subyektlari uchun yangi sheriklik aloqalarini shakllantirish, xalqaro taʼlim va amaliyot dasturlarini kengaytirish, xorijiy talabalar va professor-o‘qituvchilar oqimini ko‘paytirishga xizmat qiladi.

BuxDU Axborot xizmati