Buxoro davlat universiteti rektori O.Xamidov va Taʼlim sifatini taʼminlash departamenti boshlig‘i Z.Nurov joriy yilning 04-09 dekabr kunlari Birlashgan Arab Amirliklarining Dubay va Sharja shaharlarida xizmat safarida bo‘lib qaytdi.
Safardan asosiy maqsad: Birlashgan Millatlar Tashkilotining Iqlim O‘zgarishi bo‘yicha COP28 tadbiri doirasida bo‘lib o‘tgan “Barqaror kelajakni rivojlantirish” bo‘yicha xalqaro konferensiyada (ICASF-2023) faol ishtirok etib, maqola taqdim etgan holda panel sessiyasida taqdimot qilish, GreenMetrics xalqaro reyting agetligi mukofotlarini topshirish marosimida qatnashish, QS jahon universitetlari reytingida 181-o‘rinda turgan Xalifa universiteti rahbariyati bilan uchrashuv o‘tkazish, hamda Sharja shahrida joylashgan Al Qosimiya universiteti rahbariyati bilan keng qamrovli hamkorlikni yo‘lga qo‘yish bo‘yicha muzokaralar o‘tkazish.
Dubay shahriga 4 dekabr kuni kechki payt yetib borildi. Shu kunning o‘zida BMTning Iqlim o‘zgarishi COP28 tadbirlarida (jumladan O‘zbekiston pavilyonida ham) ishtirok etildi. Asosiy tadbirlar 5 dekabr kunidan boshlab amalga oshirildi.
5-dekabr kuni rektor O.Xamidov Grinmetriks xalqaro reyting agentligi natijalari va taqdirlash marosimida qatnashdi. Tadbir doirasida, yuqori 10 talik reytingi eʼlon qilinganidan so‘ng Buxoro davlat universiteti Grinmetriks agentligining butun dunyo bo‘ylab 2023-yildagi “Eng faol milliy koordinatori” sifatida eʼtirof etildi va mukofotlar topshirildi. Rektor O.Xamidov so‘zga chiqib, Grinmetriks agentligi hamda atrof-muhitga befarq bo‘lmagan barchaga minnatdorchilik bildirdi.
6-dekabr kuni Birlashgan Millatlar Tashkilotining Iqlim O‘zgarishi bo‘yicha SOP-28 tadbiri doirasida tashkil etilgan “Barqaror kelajakni rivojlantirish” bo‘yicha xalqaro konferensiyada (ICASF-2023) Buxoro davlat universiteti delegatsiyasi faol ishtirok etib, ikkita maqola taqdimoti amalga oshirildi va panel sessiyalarda taqdimotlar qilindi. Konferensiya yakunida maqola yuzasidan taqdimot qilganlarga sertifikatlar topshirildi.
7-dekabr kuni delegatsiya COP-28 ko‘rgazma pavilyonida QS xalqaro reytingida 181-o‘rinni egallagan Xalifa universiteti bilan hamkorlikni yo‘lga qo‘yish maqsadida ushbu universitet rahbariyati bilan uchrashuv o‘tkazildi. Delegatsiya Xalifa universiteti ilmiy ishlanmalari va loyihalar bilan tanishdi. Rektor hamkorlik uchun qiziqishning aniq sohalarini, jumladan, biotexnologiya, IT texnologiyalari, chiqindilarni boshqarish, kimyo, biologiya va boshqa ilmiy sohalarni belgilab berdi. Muhokama potensial hamkorlik loyihalari, jumladan, talabalar va professor-o‘qituvchilar uchun almashinuv dasturlari, qo‘shma tadqiqot tashabbuslari va o‘quv dasturiga yangi mavzularni kiritish kabilar yuzasidan bo‘ldi. Rektor O.Xamidov Xalifa universiteti vakillarini Buxoroga taklif qilish va hamkorlik imkoniyatlarini o‘rganishga tayyorligini bildirdi. Suhbat davomida suv resurslarini boshqarish, qishloq xo‘jaligi va qurg‘oqchil hududlar bilan bog‘liq muammolarni hal qilish uchun innovatsion yechimlar muhimligi haqida ham so‘z bordi, asosiy eʼtibor Xalifa universitetining suvdan oqilona foydalanish yo‘nalishlariga qaratildi. Muhokamalarda Xalifa universitetining ilmiy va innovatsion tashabbuslari, o‘zaro almashinuv va hamkorlikni rivojlantirish masalalari muhokama qilindi.
8-dekabr kuni rektor O.Xamidov BAAning Sharja shahriga tashrif buyurib, Al Qosimiya universiteti rahbariyati bilan uchrashdi. Muhokamalarda o‘quv va amaliy mashg‘ulotlarda o‘zaro ishtirok etish, qo‘shma ilmiy tashabbuslar, talabalar almashinuvi, ilmiy va madaniy tadbirlarni tashkil etish masalalari muhokama qilindi. Keyingi kun delegatsiya Buxoro shahriga qaytib keldi.
