Buxoro davlat universiteti rektori, prof. O.Xamidov joriy yilning 7-10 noyabr kunlari Rossiya Federatsiyasining Sankt-Peterburg shahrida xizmat safarida bo‘lib qaytdi.
Safardan ko`zlangan maqsad Sankt-Peterburg davlat iqtisodiyot universiteti rahbariyati bilan uchrashish, “Faxriy professor” unvonini taqdim etish marosimida ishtirok etish, universitet kengashi aʼzolari va jamoatchilik oldida ilmiy maʼruza bilan chiqish qilish, Sankt-Peterburg politexnika universiteti rahbariyati bilan uchrashuv o‘tkazish, hamkorlik shartnomasini imzolash hamda ushbu universitet hamkorligida tashkil etilayotgan “O‘tmish va kelajak chegarasida: global transformatsiya” mavzusidagi V Xalqaro munitsipial forumda ishtirok etishdan iborat.
Sankt-Peterburg shahriga 7 noyabr kuni kechki payt yetib borildi. Asosiy tadbirlar 8-noyabr kunidan boshlab amalga oshirildi.
8-noyabr kuni Sankt-Peterburg davlat iqtisodiyot universiteti rahbariyati bilan uchrashuv o‘tkazildi. Uchrashuvda o‘zaro hamkorlikning asosiy yo‘nalishlari va imkoniyatlar muhokama qilindi. Tegishli “yo‘l xaritasi” imzolanib, u o‘z ichiga 2025 yilgacha bo‘lgan muddatda amalga oshiriladigan tadbirlarni qamrab oladi. Shu jumladan, ushbu muddatda talabalar va professor-o‘qituvchilar almashinuvi, hamkorlikdagi ilmiy va ilmiy-uslubiy ishlarning mavzulari bo‘yicha kelishildi. Yo‘l xaritasi ijrosi bo‘yicha ilk tadbir joriy yilning 6-18-dekabr kunlari SPbDIUdan “Turizm” mutaxassisligidagi 10 nafar magistrant talabaning BuxDUda amaliyot o‘tashi hamda 50 nafardan ortiq xorijiy ishtirokchilar bilan o‘tkaziladigan “Ekoturizm va jamoaga tayanuvchi turizm (CBT)” tadbirida o‘z loyihalari bilan ishtirok etishlari bo‘yicha kelishildi. SPbDIUning tegishli kaferalarida BuxDU doktorantlarining dissertatsiyalarini o‘qib, xulosa va taqriz berish, maslahat soatlari va seminarlar tashkil qilish bo‘yicha tadbirlar grafigi ishlab chiqildi.
Shu kunning o‘zida SPbDIU kengashi yig‘ilishida ishtirok etildi. Yig‘ilishda universitet rektori I.Maksimsev so‘zga chiqib, universitet kengashi tomonidan iqtisodiyot va turizm sohasidagi ilmiy izlanishlari, oliy taʼlimdagi transformatsiya jarayonlarini amalga oshirish, yuqori malakali kadrlar tayyorlash sohasidagi erishilgan yutuqlari uchun BuxDU rektori O.Xamidovga SPbDIU faxriy doktori unvoni berilishiga qaror qilinganligini eʼlon qildi. O.Xamidovga faxriy doktor diplomi hamda mantiyasi tantanali ravishda topshirildi. Shundan so‘ng, O.Xamidov “O‘zbekistonda ijtimoiy-iqtisodiy taraqqiyotning asosiy yo‘nalishlari hamda oliy taʼlimning transformatsiyasi” mavzusida maʼruza o‘qidi.
9-noyabr kuni V xalqaro munitsipial forumda ishtirok etildi. Forum mavzusi – “O‘tmish va kelajak chegarasida: global transformatsiya” bo‘lib, forumning maqsadi – hududlarda ijtimoiy-iqtisodiy masalalarni hal qilish, yirik shaharlardagi kundalik hayotga axborot, raqamli va innovatsion texnologiyalarni joriy qilish bo‘yicha ilg‘or tajribalarni taqdim etishdir. Forumda 56 mamlakatdan 7 ming nafarga yaqin delegat ishtirok etdi. Forum doirasida turli korxona, tashkilot hamda OTM vakillari bilan uchrashuvlar o‘tkazildi. Shu jumladan, Sankt-Peterburg politexnika universiteti bilan hamkorlik shartnomasi imzolandi, Eronning Shahid Beheshti universiteti vakillari bilan ilmiy hamkorlik yo‘nalishlari muhokama qilindi. Ushbu universitet bilan hamkorlik aloqalari O‘zbekiston Respublikasi Prezidenti Sh.Mirziyoyev boshchiligida Eron Islom Respublikasiga amalga oshirilgan oliy darajadagi tashrif davomida Oliy ta‘lim, fan va innovatsiyalar vazirligi tomonidan erishilgan kelishuvlarni amalga oshirishi bo‘yicha yo‘l xaritasi doirasida olib borilmoqda.
O.Xamidov forumning turizmga bag‘ishlangan seksiya ishida ham ishtirok etdi va ishtirokchilarni ushbu sohada O‘zbekistonda olib borilaytorgan ishlar bilan tanishtirib o‘tdi.
10-noyabr kuni Sankt-Peterburg politexnika universiteti faoliyati bilan tanishildi, turli institutlar rahbariyatlari bilan uchrashuvlar o‘tkazildi. Shu jumladan, universitet kutubxonasi, Texnopark, Masofaviy va ochiq ta’lim markazi, Sanoat menejmenti, iqtisodiyot va savdo instituti (iqtisodiyot, turizm, menejment, marketing sohalari bo‘yicha Top-150-400 guruhlarida) rahbariyati bilan kelishuvlarga erishildi. Sanoat menejmenti, iqtisodiyot va savdo instituti bilan hamkorlikda ilmiy seminarlarni tashkil qilish bo‘yicha reja tasdiqlandi. Ushbu institutda BuxDUdan 10 nafar professor-o‘qituvchining malaka oshirishi ham noyabr-dekabr oylarida tashkil etiladi. Shu kunning o‘zida rektor O.Xamidov boshchiligidagi delegatsiya Buxoro shahriga qaytib keldi.
