Qirlarda boychechak bilan uyg’ongan ona tabiat zamin uzra sekin-asta o’z sepini yozdi. Esayotgan ko’klam nasimi mudroqlarni tarqatib yubordi. Qushlar kurtak ochayotgan daraxt shoxlariga qo’nib, olamning uyg’onishini kuyga soldi. Jarchining ovozi dunyoni tutib, odamlarni bayram sayliga, gul fasli – Navro’zi olam tantanalariga chorladi.Viloyatimiz uzra bayram sayllari ana shunday boshlandi. 2017 yil 23 mart kuni Buxoro shahrining so’lim go’shalari - Abu Ali ibn Sino nomidagi Favvoralar maydonida, Ark qo’rg’oni atrofida, Labi Hovuz majmuasi, Markaziy istirohat bog’ida bayramona bezatilgan ko’cha va xiyobonlarda Navro’z sayli tantanalari o’tkazildi. Universitet talabalari erta tongdan ayyom munosabati bilan yangi liboslarda bayramona kayfiyatda saylga oshiqdi. Karnay-surnay sadolari bilan kutib olingan odamlar haqiqiy Navro’z ruhini his qildi. Maydon bo’ylab xalqimizning ma’naviy qiyofasini aks ettiruvchi milliy ayvonlar tashkil etildi. Yo’laklar bo’ylab “Tasviriy san’at va muhandislik grafikasi” kafedrasi professor-o’qituvchi va talabalarining “Xush kelding – Navro’zi olam” shiori ostida xalq amaliy san’atining nodir namunalaridan ko’rgazmalar tashkil etildi. Bir tomonda Jismoniy madaniyat va Harbiy fakultet talabalari o’zlarining milliy sport o’yinlari bilan sayl ishtirokchilarini xushnud etdilar. Xalqimizning ming yillik turmush tarzi, an’ana-yu odatlaridan xabar beruvchi xalq o’yinlari - arqon tortishlar, kurash, Filologiya fakulteti talabalari tomonidan aytilgan she’r va qo’shiqlar bayramga fayz berdi. Fakultetlar o’zlari tayyorlagan sumalak, halim, ko’k somsa kabi tansiq taomlarni dasturxonga tortib, ko’pchilik bilan baham ko’rishdi, Tarix va Pedagogika fakultetlari xalq o’yinlari tashkil etib, tomoshalar uyushtirishdi. “Sust xotin”, “Er hayda” kabi laparlar aytishdi. Tabiiy fanlar fakulteti talabalari so’rilar atrofida chordona qurib o’tirgan otaxonu onaxonlarimiz bilan suhbat qurib duolarini olishdi. Fizika-matematika fakulteti talabalari shaxmat va shashka o’yinlarini tashkil etib, sayl ishtirokchilarini ham o’yinga jalb etishdi. Navro’zning o’lmas ruhi va qadriyatlari zamonaviylik kasb etganining guvohi bo’ldik. Tinch va osoyishta kunlarimizga shukrona aytib, har kunimiz Navro’zdek farahbaxsh bo’lishini niyat qilamiz. Bayram yana bir bora muborak bo’lsin!
