Bugun Buxoro davlat universitetida har yili an’anaviy tarzda o`tkazilib kelinayotgan “Tafakkur va talqin” nomli Respublika miqyosidagi ilmiy-amaliy konferensiya bo`lib o`tdi.
Har yilgidan farqli o`laroq, nainki BuxDU magistrantlari, balki iqtidorli talabalar, tayanch doktorantlar va doktorantlar, professor-o`qituvchilar, Respublikamizning turli viloyatlaridan tezislarni qabul qilgan ushbu konferensiya 300 dan ortiq ilmiy ishlarni o`z ichiga qamrab oldi. Konferensiya doirasida, “Tafakkur va talqin” deb nomlangan to`plamda turli sohalarda, xususan, aniq va tabiiy fanlar, lingvistika, adabiyotshunoslik (o`zbek, rus, ingliz, fransuz), iqtisodiyot va turizm, pedagogika va psixologiya, amaliy san’at va san’atshunoslik kabi bir qancha yo`nalishlarda tezislar jamlandi.
– Bugungi ilmiy-amaliy konferensiya har galgidan takomillashgan, kundan-kunga rivoj topayotgan ilm-fanimiz tadqiqiga bag`ishlangan. Keltirilgan maqolalar yosh tadqiqotchilarning izlanishlarining ilk samarasi bo‘lib, bu natijalarni ommalashtirish, yosh tadqiqotchilarning ilmiy faoliyatlari yo‘nalishlari bo‘yicha hamkor korxonalar va o‘z sohasining yetuk olimlari bilan tanishishlariga imkoniyat yaratish lozim.
Kelajakda BuxDUning izlanuvchan talabalari orasidan o‘z ilmiy maktablariga ega bo‘lgan olimlar, nufuzli xalqaro oliy dargohlarda dars bera oladigan ustozlar, xalq xo‘jaligining fidoiy xodimlari, jamiyatimizga kerakli kadrlar yetishib chiqishiga ishonamiz, – dedi Buxoro davlat universiteti rektori, professor Obidjon Xamidov.
Anjumanda so`zga chiqqan BuxDU magistratura bo’limi boshlig’i, fizika-matematika bo`yicha falsafa doktori (PhD) Akmal Turayev o`tgan yilgi konferensiyalardan bu galgi konferensiyaning farqli jihatlari, magistrantlarning sifat jihatdan o`sib borayotgani xususida alohida to`xtaldi. So`z yakunida magistrantlarning ilmiy faoliyatlarida muvaffaqiyat tiladi.
“Oliy ta’lim tizimining xalqarolashuvi jarayonida magistraturaning o‘rni” mavzusidagi BuxDU Xalqaro hamkorlik bo‘yicha prorektori, dotsent Abror Jo'rayevning ma’ruzasi yig`ilganlarga iliq tassurot qoldirish barobarida kelgusi ishlarida va maqsadlarini rejalashtirishlarida motivatsiya bera oldi. Ustoz Abror Jo`rayev BuxDUning ilk qaldirg`och magistranti bo`lgan davlaridagi xotiralari, bugungi kunda jahon miqyosida magistrantga bo`lgan talab va jahon mehnat bozorida ularning o`rni xususidagi faktlar va statistik ma’lumotlar bilan o`rtoqlashdi.
“Texnika taraqqiyotida Fizika fanining o‘rni” nomli ma’ruzasi bilan zamonaviy bilimlarni o`rtoqlashgan BuxDU Fizika kafedrasi professori, Davron Djurayev mavzuni tushuntirish asnosida ilmiy izlanuvchilarga baxt va xotirjamlik tiladi.
Ilmiy maqola yozish va uni chop etish, jamiyatga kerakli ilmiy ishlar qilish borasida o`z fikrlarini o`rtoqlashgan Matematik analiz kafedrasi professori To’lqin Rasulovning “Ilmiy tadqiqot natijalarini miqdoriy baholovchi H-indeks va iqtiboslik haqida” nomli ma’ruzasi ilm toliblari uchun manfaatli bo`ldi.
Ilmiy-amaliy anjuman doirasida Adabiyotshunoslik, lingvistika, pedagogika, psixologiya, axborot texnologiyalari, sport kabi bir qancha yo`nalishlardagi ma’ruzalar tinglandi.
“Tafakkur va talqin” nomli ilmiy-amaliy konferensiyaning 789 safihadan iborat birinchi qismi nashr etildi. Yaqin kunlarda ikkinchi qismi ham nashrdan chiqishi kutilmoqda.
