11.01.2022

2020-yilning 12-noyabr kuni Buxoro shahar M.Burhonov MFY 7-umumta'lim maktabida BuxDU o'quv ishlari bo'yicha prorektori M.I.Daminov, Islom tarixi va manbashunosligi kafedrasi mudiri B.Namozov, 7-son IDUM jamoasi, MFY raisi, shuningdek “Ma’rifat” targ‘ibotchilar guruhi va Yozuvchilar uyushmasi a’zolari, siyosatchilar, olimlar, madaniyat arboblari, san’atkorlar, psixologlar ishtirokida "Yangi O'zbekiston - yangicha dunyoqarash" mavzusida ma'naviy-ma'rifiy tadbirlar bo'lib o'tdi. Maktab hovlisi va binosida, sport zalida tadbirning tantanali qismi boshlanishidan oldin Beshta muhim tashabbus yo‘nalishlarida shaxmat-shashka, futbol, kurash musobaqalari, kitobxonlik, she’rxonlik tadbirlari, hunarmandchilik, rassomchilik ko‘rgazmasi tashkil qilindi. Tadbirga tayyorgarlik ko‘rish davrida Buxoro davlat universiteti rektori O.Xamidov, Buxoro shahar hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari A.Hayitov, Buxoro viloyati Madaniyat boshqarmasi boshlig‘i Y.Genjayevlar tashrif buyurib, ishchi guruhga amaliy yordam ko‘rsatdilar.Tadbirga tashrif buyurgan mahalla vakillari musiqa sadolari va alohida ehtirom bilan kutib olindi. Ular tashkil qilingan musobaqa va ko‘rgazmalar bilan tanishdilar. Tadbirning asosiy qismi soat 10:10 da 7-maktab faollar zalida Buxoro davlat universiteti prorektori M.Daminovning “Yangi O‘zbekiston – yangicha dunyoqarash” mavzusidagi kirish so‘zi boshlandi.M.I.Daminov yig‘ilganlarga “Yangi O‘zbekiston – yangicha dunyoqarash” g‘oyasi, mamlakatimizda so‘nggi yillarda o‘tkazilayotgan tub islohotlarning mazmun va mohiyati hamda ahamiyati, O‘zbekistonning dunyoga ochilishi, tadbirkorlikni rivojlantirish, yangi ish o‘rinlarini yaratish borasida amalga oshirilayotgan ishlar, koronavirus pandemiyasi davrida hukumatimizning aholi sog‘ligini himoya qilish va pandemiya oqibatlarini yumshatish bo‘yicha amalga oshirayotgan siyosati, mehr-sahovat tadbirlari, ta’lim sohasidagi islohotlar, 27-28 aprel kunlari Buxoroda yuz bergan to‘fon, Sardoba voqealarida xalqimizning hamjihatligi, Buxoro viloyati va shahrining iqtisodiy va turistik salohiyati, Mutal Burhonov mahallasida so‘nggi yillarda amalga oshirilgan bunyodkorlik ishlari, xalqimizning qadriyatlari, vatanga muhabbat tuyg‘usi, shukronalik haqida gapirib berdi.Tadbirda “Yagonasan, muqaddas Vatan” respublika ko‘rik-tanlovining g‘olibi, iqtidorli xonanda Jamshid Niyozov o‘z chiqishlarida ona yurt, vatan to‘g‘risidagi qo‘shiqlarini taqdim qilib, tadbir ishtirokchilariga yuqori kayfiyat ulashdi. Chiqish davomida M.Burhonov mahallasi vakillari va tadbir ishtirokchilari raqsga tushdilar.Shundan so‘ng so‘z navbati O‘zbekiston xalq artisti Ubaydullo Omonning “Tarix, bugun va kelajak” mavzusidagi tadbir nutqiga berildi. O‘zbekistonda xalq artisti Ubaydullo Omon yurtimizda bo‘layotgan o‘zgarishlar haqida iliq fikrlarni bildirib o‘tdi. Hozirgi zamonda mehnat qilish, bilim olishning o‘zi katta bir baxt ekanligini ta’kidladi. Bugun aholining barcha qatlamlari uchun yaratib berilayotgan imkoniyatlardan xalqimiz juda mamnun ekanligini aytib o‘tdi. Tadbir mahalla yoshlari va maktab o‘quvchilarining badiiy chiqishlari bilan davom etdi. Ona vatan haqidagi she’rlar, besh tashabbus bo‘yicha badiiy ko‘rinishlar, ashula va raqslar barchani mamnun etdi.Buxoro davlat universiteti kafedra mudiri, dotsent B.B.Namozov “Biz buyuk ajdodlar vorislarimiz” mavzusida chiqish qilib, Uchinchi Renessansga poydevor yaratish davri, olis moziyda yashab o‘tgan ota-bobolarimizning jahon fani va madaniyatiga qo‘shgan hissalari, buyuk ajdodlarimizga munosib avlodni tarbiyalash, voyaga yetkazish barasida yaratilgan shart-sharoitlar, imkoniyatlar, dunyodagi va mintaqadagi geosiyosiy vaziyat xususida gapirib berdi. Shundan keyin tadbir ishtirokchilariga “Yangilanayotgan O‘zbekiston” turkumidan videoroliklar namoyish qilindi.Tadbirda O‘zbekiston yozuvchilar uyushmasi a’zosi shoira Laylo Sharipova o‘zining ona va Vatan haqidagi she’rlari bilan chiqish qildi. Mard, jasur xalqimizning qanchadadan-qancha murakkab davrlarni boshdan kechirganligi, bu davrlarda matonat bilan o‘tganligi, pandemiya insonlarni bir-biriga yanada mehr, oqibat ko‘rsatishlari uchun o‘ziga xos sinov davri ekanligi, bu sinov millatimizni ulg‘aytirganligini, jipslashtirganligini aniq misollar bilan bayon etdi.Tadbir “Feruza” raqs ansamblining “Mavriki” qo‘shig‘iga raqsi bilan davom etdi.Shuningdek, tadbirda voleybolchi qiz, bir necha respublika va xalqaro turnirlar ishtirokchisi Solihova Maftuna so‘zga chiqib, mamlakatimizda sport va jismoniy tarbiyani rivojlantirish borasida amalga oshiriliyotgan ishlar, milliy genofondni saqlash, aholining sog‘lom bo‘lishi uchun jismoniy tarbiyaning ahamiyati to‘g‘risida gapirdi.Ishchi guruh a’zolari tomonidan tadbirda faol ishtirok etgan mahalla vakillariga 20 dan ortiq badiiy kitoblar sovg‘a qilindi. Tadbirda mahalla vakillari Muslima aya, Gavhar aya Sharipovalar so‘zga chiqib, og‘ir, murakkab davrlarda sabrli, matonatli bo‘lish, shukronalikda gap ko‘p ekanligi, mamlakatimiz rahbariyatining aholining kambag‘al va ijtimoiy himoyaga muhtoj qatlamlariga o‘z vaqtida zarur yordam ko‘rsatib kelinayotganligi, buni hamma e’tirof etayotganligi va hukumatimizdan, saxovatli tadbirkorlarimizdan minnatdor ekanliklari to‘g‘risida so‘zladilar hamda tadbir tashkilotchilariga o‘z minnatdorchiliklarini izhor qildilar. Tadbir so‘ngida Muslima aya yurtimiz, xalqimizga tinchlik-omonlik, rahbarlarimizga sog‘lik-salomatlik, kuch-quvvat tilab duo qildilar. Ko‘tarinki ruhda o‘tgan tadbir soat 12:00 da O.Nazarbekovning “Vatan” qo‘shig‘i bilan o‘z yakuniga yetdi.BuxDU Matbuot xizmati