11.01.2022

Tiriklik bor ekan, mangu yashayvergin, Onajon Tilim! Oktyabr oyini yaxshi ko‘raman. Kuz faslining o‘rta oyi. Havo na kuydiradi, na sovuq qottiradi. Faqat bu emas, oktyabrning dastlabki kuni «Ustoz va murabbiylar kuni» bilan boshlanadi. Zahmatkash kasb egalarining bayrami yurt bo‘ylab tantana qilinadi…Keyin yaxshi kunlar fayzli kunlarni yetaklab kelaveradi…O‘tgan yili yurt rahbari tomonidan 21 oktyabr sanasi «O‘zbek tili bayrami» deb e’lon qilinishi bu oyning sevimliligini yana oshirdi. Mazkur ikki bayramning bir oyda nishonlanishida ham o‘ziga xoslik bor: inson botinining tarjimoni – til; insoniyatning botiniyu zohiri uning tafakkuri bilangina mohiyatli; bil’aks, inson tafakkurining chirog‘ini yoquvchi zot – ustozdir.Bugun respublikamiz miqyosida O‘zbekiston Respublikasi Prezidentining «O‘zbek tilining davlat tili sifatidagi nufuzi va mavqeini tubdan oshirish chora-tadbirlari to‘g‘risida»gi PF-5850-son Farmoni o‘zbek tili mutasaddilari, mutaxassislari, jonkuyarlari tomonidan jonu dildan bajarilyapti, desak mubolag‘a bo‘lmas… Buxoro davlat universitetida ham bu borada ishlar qizg‘in. Joriy yilning 13 oktyabr kuni «O‘zbek tilining davlat tili sifatidagi nufuzi va mavqeini tubdan oshirishda o‘zbek filologiyasi: kecha, bugun va ertaga» mavzusida BuxDU filologiya fakulteti o‘zbek tilshunosligi hamda o‘zbek adabiyoti kafedralarining sarhisob taqdimoti bayramona ruhda o‘tkazildi.Kechada fakultet jamoasi, respublika miqyosida tanilgan tilshunos va adabiyotshunos olimlar – prof. E.Qilichev, prof. S.Mo‘minov, prof. M.Abuzalova, prof. D.Rajabov, dotsentlar B.Qilichev, A.Ahmedov, H.Eshonqulov, G.Toirova, S.Nazarova, D.Yo‘ldosheva, N.Bekova, filologiya fanlari nomzodlari (PhD) Sh.Gʻulomova, N.Gʻaybullayeva, N.O‘roqova, shuningdek, yosh tadqiqotchilar, magistrant iqtidorli talabalar; «Adolat» sosial demokratik partiyasi, Xalq demokratik partiyasi, «Milliy tiklanish» demokratik partiyasi mutasaddilari yuzma-yuz hamda zoom dasturi orqali ishtirok etdilar.Yo‘nalishning kechagi kuni haqida prof. E.Qilichevning samimiy xotiralariga quloq tutildi. Filologiyaning bugungi kuni sifatida o‘zbek tilshunosligi kafedrasi a’zolari tomonidan 2019-2020 o‘quv yilida yaratilgan 5ta darslik, 8ta o‘quv qo‘llanma, yigirmaga yaqin metodik qo‘llanmalar taqdimoti o‘tkazildi. Yosh olimlar tomonidan olib borilayotgan ilmiy tadqiqot ishlaridan hikoya qiluvchi videorolikda filologiyaning ertasiga nazar tashlandi.Dastur asosida “Jahon minbarida yangragan tilim” mavzusi ostida ikki hafta davomida @buxdu_5tashabbus rasmiy kanali orqali –(“Eng yaxshi insho”, “Eng yaxshi she’r taqdimoti”, “Eng yaxshi videorolik”, “Eng yaxshi esse”, “ Eng yaxshi dars ishlanmasi”, “Eng yaxshi tasvir”, “Eng yaxshi qo‘shiq”, “Eng yaxshi audioalbom”, “Eng yaxshi taqdimot” , “Eng yaxshi o‘zbek tilining kompyuter dasturi”) – 10 ta nominasiya bo‘yicha OTM miqyosida o‘tkazilgan tanlov g‘oliblari e’lon kilindi. Gʻoliblar taqdirlandi.“Eng yaxshi qo‘shiq”, “Eng yaxshi she’r” tanlovi g‘oliblaridan go‘zal ijrolar tinglandi. “Eng yaxshi o‘zbek tilining kompyuter dasturi” g‘olibi bajargan ishini onlaynda ko‘rsatib berdi…Bir dilkash davrada tilsevarlar dildan suhbatlashdilar, fikr almashdilar, kelgusidagi vazifalarini belgilab oldilar. Tadbir tashkilotchilariga va ularga rahbarlik qilgan dosent Guli Toirovaga alohida minnatdorchilik bildira turib shunday deymiz: Bugun borligini, borlig‘ini, boyligini tantana qilayotgan ona tilim, o‘zbek xalqining eng asosiy mulki, xazinasi bo‘lgan hifzi lisonim, dunyo bor ekan, jaranglab turgin. Tiriklik bor ekan, mangu yashayvergin, Onajon Tilim!