05.11.2026

Buxoro davlat universitetida “Kibermadaniyatni yuksaltirish oyligi” doirasida talaba-yoshlarning kiberxavfsizlik sohasidagi bilim va ko‘nikmalarini oshirish, ularni zamonaviy kibertahdidlar va internet firibgarligi holatlaridan ogoh etish hamda raqamli muhitda xavfsiz faoliyat yuritish madaniyatini shakllantirishga qaratilgan profilaktik uchrashuv tashkil etildi.

Mazkur tadbirda Kiberjinoyatlarga qarshi kurashish boshqarmasi mas’ul xodimi Axtamov Doston Rustamovich hamda Buxoro davlat universiteti Raqamli ta’lim texnologiyalari departamentining axborot xavfsizligi bo‘yicha mas’ul xodimi R.N. Salimov ishtirok etib, talabalarga kiberxavfsizlikning dolzarb masalalari yuzasidan tushuntirishlar berdi.

Uchrashuv davomida kiberjinoyatlarning zamonaviy ko‘rinishlari, internet va ijtimoiy tarmoqlarda uchraydigan firibgarlik usullari, shaxsiy ma’lumotlar hamda bank kartalari xavfsizligini ta’minlash, shubhali havolalar va zararli dasturlardan himoyalanish, shuningdek, kiberjinoyatlarga qarshi kurashishning huquqiy asoslari haqida batafsil ma’lumotlar taqdim etildi.

Xususan, internet tarmog‘idan foydalanishda shaxsiy ma’lumotlarning maxfiyligini saqlash, murakkab parollardan foydalanish, ikki bosqichli autentifikatsiyani yo‘lga qo‘yish, noma’lum manbalardan kelgan xabar va havolalarga ehtiyotkorlik bilan munosabatda bo‘lish hamda elektron to‘lovlarni amalga oshirishda xavfsizlik talablariga qat’iy rioya etish muhimligi ta’kidlandi.

Shuningdek, tadbir davomida talabalar bilan ochiq muloqot tashkil etilib, raqamli muhitda hushyorlikni oshirish, axborot xavfsizligi va kibergigiyena qoidalariga amal qilish, internet va ijtimoiy tarmoqlardan to‘g‘ri hamda mas’uliyat bilan foydalanish masalalari yuzasidan fikr almashildi.

Mazkur profilaktik uchrashuv talaba-yoshlarning kiberxavfsizlik sohasidagi bilimlarini mustahkamlash, ularning internetdagi turli tahdidlarga nisbatan ogohligini oshirish, kiberjinoyatlarning oldini olish hamda universitetda kibermadaniyat va xavfsiz raqamli muhitni rivojlantirishga xizmat qildi.

Buxoro davlat universitetida “Kibermadaniyatni yuksaltirish oyligi” doirasida talaba-yoshlar va xodimlarning axborot xavfsizligi bo‘yicha savodxonligini oshirishga qaratilgan targ‘ibot-tushuntirish ishlari davom ettirilmoqda.

#KibermadaniyatOyligi2026