22.10.2026

2026-yil 22-oktyabr kuni Profilaktika kuni munosabati bilan Buxoro davlat universiteti Xorijiy tillar fakultetining 1-kurs Filologiya va tillarni o‘qitish (ingliz tili) ta’lim yo‘nalishi talabalari ishtirokida “Kiberjinoyatlarga qarshi kurashamiz” mavzusida targ‘ibot tadbiri tashkil etildi.

Tadbirda Buxoro viloyati Ichki ishlar boshqarmasi Kiberxavfsizlik boshqarmasi mas’ul xodimi ishtirok etib, talabalarga bugungi kunda uchrayotgan kiberjinoyatlar, internet orqali sodir etiladigan firibgarliklar va ulardan himoyalanish usullari haqida tushuntirishlar berdi.

Tadbir davomida ijtimoiy tarmoqlardagi soxta akkauntlar, fishing hujumlari, zararli havolalar va fayllar, shaxsiy ma’lumotlarni noqonuniy qo‘lga kiritish hamda boshqa kiberxavflar haqida ma’lumot berildi. Shuningdek, shubhali xabarlarga ishonmaslik, noma’lum havolalarni ochmaslik, kuchli parollardan foydalanish va shaxsiy ma’lumotlarni himoya qilish bo‘yicha tavsiyalar bildirildi.

Mazkur tadbirning asosiy maqsadi talabalarning kiberxavfsizlik borasidagi bilimlarini oshirish, kibermadaniyatini yuksaltirish hamda kiberjinoyatlarning oldini olishga qaratilgan profilaktik ishlarni kuchaytirishdan iborat.

Buxoro davlat universitetida yoshlarni zamonaviy kiberxavflardan ogoh etish va axborot xavfsizligi bo‘yicha bilimlarini mustahkamlashga qaratilgan targ‘ibot tadbirlari davom ettiriladi.