22.10.2026

2026-yil 22-oktyabr kuni Profilaktika kuni munosabati bilan Buxoro davlat universiteti Xorijiy tillar fakultetining 1-kurs Tarjima nazariyasi va amaliyoti (ingliz tili) ta’lim yo‘nalishi talabalari bilan hamkorlikda “Kiberjinoyatlarga qarshi kurashamiz” mavzusida targ‘ibot tadbiri tashkil etildi.

Tadbirda Buxoro viloyati Ichki ishlar boshqarmasi Kiberxavfsizlik boshqarmasi mas’ul xodimi ishtirok etib, talabalarga bugungi kunda keng tarqalib borayotgan kiberjinoyatlar, internet orqali sodir etiladigan firibgarliklar va ulardan himoyalanish usullari haqida ma’lumot berdi.

Tadbir davomida ijtimoiy tarmoqlardagi soxta akkauntlar, fishing hujumlari, zararli havolalar va fayllar, shaxsiy ma’lumotlarni noqonuniy qo‘lga kiritish holatlari hamda kiberfiribgarlikning boshqa usullari haqida tushuntirishlar berildi. Shuningdek, internetdan foydalanishda ehtiyotkor bo‘lish, shubhali xabar va havolalarga ishonmaslik, akkauntlarni kuchli parollar bilan himoyalash hamda shaxsiy ma’lumotlarni begonalarga oshkor qilmaslik bo‘yicha tavsiyalar bildirildi.

Mazkur tadbirning asosiy maqsadi talabalarning kiberxavfsizlik borasidagi bilim va ko‘nikmalarini oshirish, kibermadaniyatini yuksaltirish hamda kiberjinoyatlarning oldini olishga qaratilgan profilaktik ishlarni kuchaytirishdan iborat.

Buxoro davlat universitetida yoshlarni kiberxavflardan ogoh etish va axborot xavfsizligi bo‘yicha bilimlarini mustahkamlashga qaratilgan targ‘ibot tadbirlari davom ettiriladi.