09.09.2026

Buxoro davlat universitetida 2026–2027-o‘quv yilida o‘qishga qabul qilingan talabalar o‘rtasida axborot va kiberxavfsizlikni ta’minlash, yoshlarni turli kiberjinoyatlarning salbiy oqibatlaridan ogohlantirish hamda “dropperlik” amaliyotlariga sherik bo‘lib qolishning oldini olish maqsadida targ‘ibot va tushuntirish darslari davom etmoqda.

Mazkur darslarda talabalarga “dropperlik” tushunchasi, uning mazmun-mohiyati, ushbu faoliyatga jalb etilish usullari hamda dropper sifatida foydalanilgan shaxslar duch kelishi mumkin bo‘lgan huquqiy va boshqa salbiy oqibatlar haqida batafsil ma’lumotlar berilmoqda.

Shuningdek, talabalarga noma’lum shaxslarning takliflariga ishonmaslik, o‘z bank kartalari, hisob raqamlari va boshqa moliyaviy vositalarini begona shaxslarga bermaslik, shubhali pul o‘tkazmalarida vositachi bo‘lmaslik hamda “oson daromad” va’dalariga aldanmaslik bo‘yicha tavsiyalar berilmoqda.

Tadbirlar davomida internet va messenjerlardan xavfsiz foydalanish, shaxsiy ma’lumotlarni himoya qilish, shubhali havola va fayllarni ochmaslik, noma’lum mobil ilovalarni o‘rnatmaslik hamda kiberxavfsizlik qoidalariga rioya qilishning ahamiyati ham tushuntirilmoqda.

Buxoro davlat universitetida talabalarning kiberxavfsizlik bo‘yicha bilim va ko‘nikmalarini oshirish, ularni kiberjinoyatlarning turli ko‘rinishlaridan himoya qilish hamda kibermadaniyatini yuksaltirishga qaratilgan targ‘ibot-tashviqot ishlari izchil davom ettiriladi.