08.09.2026

Buxoro davlat universitetiga yangi qabul qilingan talabalar o‘rtasida axborot va kiberxavfsizlikni ta’minlash, yoshlarning kibermadaniyatini yuksaltirish hamda turli kiberxavflardan himoyalanish ko‘nikmalarini shakllantirish maqsadida targ‘ibot va tushuntirish darslari tashkil etilmoqda.

Mazkur mashg‘ulotlarda talabalarga “Dropperlik” tushunchasi, uning mohiyati, tarqalish usullari va keltirib chiqarishi mumkin bo‘lgan xavflar haqida batafsil ma’lumotlar berilmoqda. Dropper — qurilmaga boshqa zararli dasturlarni joylashtirish yoki o‘rnatish uchun xizmat qiluvchi zararli dastur turi bo‘lib, u foydalanuvchini chalg‘itish maqsadida turli fayl, dastur yoki hujjatlar ko‘rinishida tarqatilishi mumkin.

Darslar davomida talabalar noma’lum manbalardan fayl va dasturlarni yuklab olmaslik, shubhali havolalarga kirmaslik, elektron pochta va messenjerlar orqali kelgan noma’lum fayllarni ochmaslik, dasturiy ta’minotlarni faqat ishonchli manbalardan o‘rnatish, shuningdek, antivirus himoyasidan foydalanish kabi muhim xavfsizlik qoidalari bilan tanishtirilmoqda.

Shuningdek, talabalar e’tiboriga kiberjinoyatchilar tomonidan zararli dasturlarni tarqatishda qo‘llaniladigan ijtimoiy muhandislik usullari, soxta dasturlar va hujjatlar, shubhali havolalar hamda turli “sovrin”, “grant”, “ish taklifi” yoki boshqa yolg‘on xabarlar orqali foydalanuvchini zararli faylni ishga tushirishga undash holatlari haqida tushuntirishlar berilmoqda.

Targ‘ibot darslarining asosiy maqsadi — yangi talabalar orasida kiberhushyorlikni oshirish, shaxsiy ma’lumotlar va qurilmalar xavfsizligini ta’minlash, zararli dasturlardan himoyalanish bo‘yicha amaliy ko‘nikmalarni shakllantirish hamda universitetning yagona axborot muhitida xavfsizlik madaniyatini rivojlantirishdan iborat.

Buxoro davlat universitetida talabalarning raqamli muhitdan xavfsiz va mas’uliyatli foydalanishini ta’minlashga qaratilgan bunday targ‘ibot va tushuntirish ishlari izchil davom ettiriladi.