13.05.2026

Bugun, 13-may kuni Buxoro davlat universitetida Vengriya Davlat xizmati milliy universiteti (Ludovika) delegatsiyasi ishtirokida suv xo‘jaligi sohasidagi dolzarb muammolarga bag‘ishlangan ilmiy seminar bo‘lib o‘tdi. Tadbirni Buxoro davlat universiteti Ilmiy ishlar va innovatsiyalar bo‘yicha prorektori Kamoliddin Samiyev kirish so‘zi bilan ochib berdi.

Seminarda vengriyalik mutaxassislar — Atrof-muhit barqarorligi instituti direktori Tibor Biro, Vengriya Davlat xizmati milliy universiteti (Ludovika) xalqaro aloqalar bo'yicha kordinator Fanny Sara Felvinczi hamda Suv fanlari fakulteti dekan muovini Tamash Palvolgi o‘z ma’ruzalari bilan ishtirok etdilar. Muloqot davomida global iqlim o‘zgarishi sharoitida suv resurslarini oqilona boshqarish, sohadagi zamonaviy innovatsion texnologiyalar va Vengriyaning ilg‘or tajribasini mintaqamiz sharoitiga tatbiq etish masalalari atroflicha muhokama qilindi.
 

Ushbu tadbirda BuxDU professor-o‘qituvchilari va soha mutaxassislari xalqaro ekspertlar bilan ilmiy hamkorlikni kengaytirish, suv xo‘jaligi bo‘yicha qo‘shma loyihalarni amalga oshirish hamda kadrlar tayyorlash tizimini takomillashtirish yuzasidan fikr almashdilar. Mazkur seminar ikki oliy ta’lim muassasasi o‘rtasidagi akademik aloqalarni mustahkamlash va ekologik barqarorlikni ta’minlash yo‘lidagi muhim qadam bo‘ldi.