15.10.2026

11-oktabr — Xalqaro qizlar kuni munosabati bilan Buxoro davlat universiteti Yoshlar ittifoqi boshlang‘ich tashkiloti hamda Xotin-qizlar bilan ishlash bo‘limi hamkorligida “Biz Yangi O‘zbekiston farzandimiz” shiori ostida “Yangi O‘zbekistonning iqbolli qizlari” nomli ma’naviy-ma’rifiy va intellektual ko‘rik-tanlov tashkil etildi.

Tadbirni universitet Xotin-qizlar bilan ishlash bo‘limi mas’ul xodimi D. Mirova ochib berib, talaba-qizlarni bayram bilan samimiy tabrikladi. O‘z nutqida xotin-qizlarning ta’lim olishi, ilm-fan, madaniyat va jamiyat hayotida faol ishtirok etishi uchun yaratilayotgan imkoniyatlar hamda yoshlarning intellektual va ijodiy salohiyatini qo‘llab-quvvatlash muhimligini ta’kidladi. Tadbirda Buxoro viloyati

Yoshlar markazi mas’ullari ham ishtirok etdi.
Ko‘rik-tanlov uchta shart asosida o‘tkazildi:
 “Men Yangi O‘zbekiston farzandiman” — ishtirokchilar o‘zlarini tanishtirib, hayotiy qarashlari, kasbiy maqsadlari va intilishlarini bayon etdilar.
 “Ijodkor qiz” — talaba-qizlar o‘zlarining yangi g‘oyalari, ilmiy va amaliy loyihalari hamda ijodiy qobiliyatlarini namoyish etdilar.
 “Mening orzuimdagi O‘zbekiston” — jamiyatdagi dolzarb masalalar va ularning yechimlariga bag‘ishlangan bir daqiqalik videoroliklar taqdim etildi.

Hakamlar hay’ati tomonidan ishtirokchilarning chiqishlari baholanib, g‘oliblar va faol qatnashchilar turli nominatsiyalar bo‘yicha aniqlanib, esdalik sovg‘alari bilan taqdirlandilar.

Bayramona ruhda o‘tgan tadbir talaba-qizlarning bilim, iste’dod va tashabbuslarini namoyon etish, ularning o‘ziga bo‘lgan ishonchini mustahkamlash hamda ijtimoiy faolligini oshirishga xizmat qildi.