09.07.2026

BUXORO DAVLAT UNIVERSITETIDA DZYUDO TO‘GARAGI FAOLIYAT OLIB BORMOQDA

Buxoro davlat universitetida sportning dzyudo turi bo‘yicha to‘garak mashg‘ulotlari muntazam ravishda yuqori saviyada tashkil etilgan. To‘garak mashg‘ulotlariga mashhur paradzyudochi, xalqaro toifadagi sport ustasi, ikki karra Paralimpiya o‘yinlari chempioni Sherzod Namozov, shuningdek, dzyudo bo‘yicha sport ustalari Bilol Rashidov va Mirfayz Muhammedov murabbiylik qilib kelmoqdalar. Mashg‘ulotlar tajribali va malakali murabbiylar rahbarligida zamonaviy usullar asosida olib borilmoqda.
 

Ayni vaqtda to‘garakda 5 yoshdan 14 yoshgacha bo‘lgan 30 nafarga yaqin yosh sportchi muntazam shug‘ullanmoqda. Mashg‘ulotlar haftaning dushanba, seshanba, chorshanba, payshanba va juma kunlari o‘tkaziladi. Shuningdek, har shanba kuni to‘garak ishtirokchilari uchun jismoniy tayyorgarlik va sog‘lom turmush tarzini mustahkamlash maqsadida basseynda suzish mashg‘ulotlari tashkil etilgan.

To‘garak mashg‘ulotlarida Buxoro viloyatining Jondor, Romitan va Kogon tumanlari, shuningdek, Buxoro shahrining 10 ga yaqin mahallalaridan kelgan yoshlar faol ishtirok etib kelmoqdalar.
Siz ham farzandingizni tajribali murabbiylar qo‘lida chiniqtirish, sog‘lom va irodali, vatanparvar sportchi etib tarbiyalashni istasangiz, Buxoro davlat universiteti huzuridagi dzyudo to‘garagiga taklif etamiz!
Buxoro davlat universiteti – chempionlar yetishadigan maskan!