23.09.2026

“MUSHOIRA” KLUBI —  SHE’RIYAT VA IJOD IXLOSMANDLARINI BIRLASHTIRGAN DAVRA

Buxoro davlat universitetida yangi o‘quv yili doirasida “Mushoira” klubining navbatdagi uchrashuvi o‘tkazildi. She’riyat va badiiy ijodga mehr qo‘ygan professor-o‘qituvchilar hamda talabalar ishtirokidagi uchrashuv samimiy va ko‘tarinki ruhda kechdi.
Ayniqsa, 2-kursda tahsil olayotgan pokistonlik talaba Usmon Ahmadning o‘zbek tilida ravon so‘zlab, o‘zbek talabalari bilan birgalikda she’rlar ijro etgani uchrashuvga o‘zgacha fayz va mazmun bag‘ishladi. Uning o‘zbek adabiyoti va she’riyatiga bo‘lgan qiziqishi, ona tilimizda erkin muloqot qilishi yig‘ilganlarda katta taassurot qoldirdi. Mazkur jarayon turli millat vakillarini adabiyot, she’riyat va ijodga bo‘lgan umumiy qiziqish atrofida yanada yaqinlashtirdi.
Uchrashuv davomida she’riyat, badiiy ijod, she’rning yaratilish tarixi, ijodkorlik va adabiyotga mehr kabi mavzularda qizg‘in fikr almashildi. Ishtirokchilar o‘z ijod namunalaridan, shuningdek, sevib mutolaa qiladigan shoir va ijodkorlarning sara she’rlaridan namunalar ijro etdilar.
Samimiy muloqotlar, mazmunli suhbatlar va she’riy chiqishlar bilan davom etgan uchrashuv ishtirokchilarga ko‘tarinki kayfiyat ulashdi. “Mushoira” klubi yoshlarning adabiyot va she’riyatga bo‘lgan qiziqishini yanada oshirish, ularning ijodiy salohiyatini yuzaga chiqarish, kitobxonlik va badiiy tafakkurni rivojlantirish, shuningdek, turli millat vakillari o‘rtasidagi do‘stona munosabatlarni mustahkamlashga xizmat qilmoqda.