2021-yilning 25, 26-fevral kunlarida Innovatsion rivojlanish vazirligida Innovatsion rivojlanish vazirligi, Oliy va oʼrta maxsus taʼlim vazirligi hamda Fanlar akademiyasi bilan birgalikda xoʼjalik boshqaruvi organlari, tarmoq korxonalari, Qoraqalpogʼiston Respublikasi Vazirlar Kengashi va viloyat xokimliklarining oliy taʼlim muassasalari va ilmiy tashkilotlar bilan hamkorligini rivojlantirishga qaratilgan ilmiy ishlanmalarni tijoratlashtirishga qaratilgan Forum boʼlib oʼtdi.
Forum doirasida Ekologiya va geografiya kafedrasi professori, b.f.d.,
A.E. Xolliyev tomonidan ishlab chiqilgan gʼoʼza va boshqa ekinlarning ekologik stressorlarga chidamliligini oshiruvchi yangi qurilma taqdimot qilindi. Forum doirasida Buxoro viloyati hokimligi, Buxoro davlat universiteti, Buxoro viloyat qishloq xoʼjalik boshqarmasi hamda Innovatsion rivojlanish vazirligi hamkorligida ushbu loyihani tijoratlashtirish boʼyicha 4 tomonlama shartnoma imzolandi hamda ushbu loyiha Buxoro viloyat hokimligi tomonidan moliyalashtirildi.
2021-yilning 27-28 may kunlari Buxoro Neft' va gaz sanoati kollejida qurilish materiallari, neft va gaz sanoati, yengil sanoat tarmog‘i, qorako‘lchilik, qishloq va suv xo‘jaligi, turizm sohasi korxonalari ishtirokida hududiy tarmoqlararo sanoat yarmarkasi bo‘lib o‘tdi. Sanoat yarmarkasida Tabiiy fanlar hamda Agronomiya va biotexnologiya fakulteti professor-o‘qituvchilari tomonidan ishlab chiqilgan 8 ta loyihaning taqdimoti o‘tkazildi. Hozirgi kunda universitetning iqtidorli talabalari tomonidan ham turli sohalarga oid loyihalar ishlab chiqilmoqda. Ushbu loyihalardan orasidan tanlab olingan 7 ta loyiha yarmarka doirasida taqdimot qilindi.
2021-yil 30-oktyabrda Buxoro shahrida IT sohada faoliyat yurituvchi kompaniyalar tomonidan ishlab chiqarilgan dasturiy mahsulotlar hamda axborot tizimlarini taqdim etish imkonini beruvchi “Buxoro IT-Expo-2021” ko‘rgazmasi bo’lib o’tdi. Ko’rgazmada o’zlarining yuqori texnologiyali mahsulot va xizmatlarni taqdim etgan 30 dan ortiq IT kompaniyalar hamda Oliy ta’lim muassasalari ishtirok etishdi.
Buxoro davlat universitetining Axborot texnologilari fakulteti professor-o’qituvchilar va iqtidorli talabari ham sohaga oid mahsulotlar taqdimotini o’tkazishdi. Buxoro davlat universitetining Axborot texnologilari fakulteti jamoasi tomonidan qiymati 6,0 mlrd. so’mdan yuqori bo’lgan 11 dan ortiq dasturiy mahsulotlar taqdimot qilindi.
Shu jumladan:
1. Blokcheyn texnologiyasidan foydalangan holda sun'iy intellektga asoslangan onlayn ta'lim uchun platforma yaratish;
2. Atmosferada zararli moddalarning ko‘chishi va diffuziyasini monitoring va bashoratlash uchun dasturiy majmua ishlab chiqish;
3. VR-CLASSROOM va virtual sayohat;
4. Xususiy tibbiyot korxonalari uchun avtomatlashtirilgan tizim ishlab chiqish;
5. Qurilish korxonalari uchun 3D obyektlardagi o’zgarishlarni avtomatlashtirilgan tizimi;
6. Cinerama mobil ilovasi;
7. “Uniwork” OTM larda o‘quv jarayonini tashkil qilish va monitoring platformasi;
8. Aholi orasida kambag’allikni monitoring qilish dasturi;
9. Ilmiy konferensiyalarni o‘tkazish monitoring tizimi;
10. Olimp.buxdu.uz – Onlayn fan olimpiadalarini o’tkazish platformasi;
11. Eduline.uz – Onlayn masofaviy o‘qitish platformasi.
Buxoro viloyati hokimi B.K. Zaripov, universitet rektori O.X. Xamidov hamda Ilmiy ishlar va innovatsiyalar bo’yicha prorektor O.S. Qahhorovlar hamrohligida Axborot texnologiyalari fakulteti o’qituvchisi N. Ergashev rahbarligidagi “Robototexnika markazi” tomonidan yaratilgan dasturiy mahsulot va loyihalar, Axborot texnologiyalari fakulteti o’qituvchisi S. Salimovning “Qurilish korxonalari uchun 3D obyektlardagi o’zgarishlarni avtomatlashtirilgan tizimi” loyihasi hamda unversitet talabasi S. Farmonovning “VR-CLASSROOM va virtual sayohat”, loyihalari taqdimoti bilan tanishdi. Ko’rgazma davomida mahalliy kompaniyalar va ishtirokchilar tomonidan ham boshqa loyihalarga qiziqish bildirildi. “Buxoro IT-Expo-2021” ko’rgazmasi yakunida Buxoro davlat universiteti jamoasi ko’rgazmada faol ishtirok etgani uchun Axborot texnologiyalari va kommunikatsiyalarini rivojlantirish vazirligi Buxoro viloyati hududiy boshqarmasi hamda IT-park tomonidan tashakkurnomalar bilan taqdirlandi.
2021-yil 23-27-noyabr sanalarida O‘zbekiston Respublikasi Innovatsion rivojlanish vazirligida Innoweek.uz-2021 Innovatsion g‘oya va ishlanmalar haftaligi bo‘lib o‘tdi (kuzgi Forum). Innovatsion g‘oyalar haftaligida har bir viloyat kesimida Innovatsion rivojlanish vazirligi bilan hamkorlikda amalga oshirilayotgan loyihalar ham taqdim etildi. Innoweek.uz-2021 Innovatsion g‘oya va ishlanmalar haftaligi universitet professor-o‘qituvchilari tomonidan hudud muammolari asosida ishlab chiqilgan loyihalar taqdimoti o‘tkazildi. Innovatsion rivojlanish vazirligi Buxoro viloyat hududiy boshqarmasi hamda Buxoro davlat universiteti tomonidan bir nechta yo‘nalishlarda hamkorlik aloqalari olib borilmoqda. Universitet professor-o‘qituvchilari tomonidan ishlab chiqilgan loyihalar hudud rivoji uchun xizmat qilmoqda. Yarmarkada Buxoro davlat universiteti professor-o‘qituvchilari tomonidan ishlab chiqilgan, umumiy summasi 2 mlrd. 411,4 mln. so‘mni tashkil etadigan 5 ta loyiha innovatsion g‘oyalar va ishlanmalar taqdimot qilindi. Xususan:
1. Ekologiya va geografiya kafedrasi professori, b.f.d. A.E. Xolliyev tomonidan ishlab chiqilgan «G‘o‘za, g‘alla va boshqa ekinlarning ekologik stressorlarga chidamliligini oshiruvchi yangi texnologiya» Innovatsion loyihasi.
Olim ushbu loyihada g‘o‘za, g‘alla va boshqa ekinlarning ekologik stressorlarga chidamliligini oshirish orqali ularning mahsuldorligini ta'minlashni maqsad qilgan. O‘rtacha hisobda hosildorlik 15-20% ga oshiriladi. Ushbu loyihaga dastlabki sinov ishlarini amalga oshirish maqsadida Buxoro viloyat hokimligi tomonidan 16,0 mln. so‘m mablag‘ ajratilgan.
2. Biologiya kafedrasi professori, b.f.d. S.B. Bo‘riyev tomonidan ishlab chiqilgan «Mikroskopik suvo‘tlarni baliqchilikda ozuqa sifatida qo‘llash» Innovatsion loyihasi.
Ushbu loyiha orqali bir vaqtda oqova suvlarni tozalash hamda olingan biomassani baliqchilik hamda chorvalikda qo‘llash mumkin. Loyiha doirasida hozirga vaqtda Buxoro, Xorazm, Toshkent, Namangan viloyatlarida yaratilgan maxsus hovuzlarda mikroskopik hamda yuksak suvo‘tlar yetishtirilmoqda.
3. Umumiy va noorganik kimyo kafedrasi professori, t.f.d. M.R. Amonov tomonidan ishlab chiqilgan «Resurs tejamkor ohorlovchi polimer kompozitsiyalarni yaratish» tijoratlashtirish loyihasi.
Ushbu loyiha Romitan innovatsion hududida «Sharq Business Solution» MChJ bilan hamkorlikda amalga oshirilmoqda. Loyiha doirasida import o‘rnini bosuvchi ohorlovchi polimer kompozitsiyalar ishlab chiqarilmoqda. Loyihani moliyalashtirish uchun Innovatsion rivojlanish vazirligi tomonidan 492,4 mln. so‘m mablag‘ ajratilgan.
4. Iqtisodiyot kafedrasi dotsenti, i.f.n. M.A. Oripov rahbarligida ishlab chiqilgan «Granula ko‘rinishidagi omuxta yem ishlab chiqarish» tijoratlashtirish loyihasi.
Ushbu loyiha ham Romitan innovatsion hududida «Novator chorvador» MChJ bilan hamkorlikda amalga oshirilmoqda. Loyiha doirasida hozirgi kunda bozorda yuqori talab mavjud bo‘lgan granula ko‘rinishidagi omuxta yem ishlab chiqariladi. Chorva mollari uchun 3 xil yo‘nalishdagi: sut yo‘nalishida, go‘sht yo‘nalishida, universal hisoblangan granula ko‘rinishidagi omuxta yem mahsuloti ishlab chiqarilmoqda. Loyihani amalga oshirish uchun Innovatsion rivojlanish vazirligi tomonidan 454,0 mln. so‘m mablag‘ ajratilgan.
5. Amaliy matematika va dasturlash texnologiyalari kafedrasi o‘qituvchisi N.X. Ergashev tomonidan ishlab chiqilgan «Blokcheyn texnologiyasidan foydalangan holda sun'iy intellektga asoslangan onlayn ta'lim uchun platforma ishlab chiqish» startap loyihasi.
Ushbu loyihani amalga oshirish orqali onlayn ta'lim sifatini yuqori darajaga ko‘tarish mumkin. Loyihani ishlab chiqarish jarayoniga Rossiyalik sun’iy intellect sohasidagi olimlar ham jalb etilgan. Ushbu loyiha hozirgi kunda Innovatsion rivojlanish vazirligi tomonidan moliyalashtirilmoqda. Loyiha qiymati 558,2 mln. so‘mni tashkil etadi.
Buxoro davlat universiteti professor-o‘qituvchilari 2022 yilda bo‘lib o‘tadigan bahorgi hamda kuzgi forumlarda innovatsion, amaliy, tijoratlashtirish hamda startap loyihalar bilan ishtiroki rejalashtirilgan.
