Mamlakatimizda barcha xayrli ishlar, ezgu amallar, avvalo, oilalarni mustahkamlash, barkamol avlodni voyaga yetkazish hamda ularning yorug‘ kelajagini ta‘minlash maqsadini ro‘yobga chiqarish uchun amalga oshirilmoqda. Ayniqsa, yoshlar sog‘lom turmush tarzini shakllantirish davlatimizning sog‘lom avlodni tarbiyalash borasidagi tub islohotlarining muhim yo‘nalishlaridan biri bo‘lganligi sabab, yoshlar orasida sog‘lom turmush tarzini targ‘ib qilish, ham jismonan, ham ma‘nan barkamol avlodni voyaga yetkazish masalasiga jiddiy e‘tibor qaratilgan. 2017 ylning 1 sentyabridan Oliy va o‘rta-maxsus ta‘lim vazirligining 2017 yil 23 avgustdagi 600-sonli buyrug‘iga asosan oliy ta‘lim muassasalarida psixolog shtati tashkil etilgan edi. Bundan maqsad yoshlarimizning nafaqat jismonan balki ruhan sog‘lom bo‘lishlari, hayot qiyinchiliklariga bardoshli, irodali bo‘lib voyaga yetishlari, talabalarning ruhiy zo‘riqishi oldini olish, shu bilan birga mushkul vaziyatga tushib qolgan, notinch oilalar farzandlariga yo bo‘lmasa tushkunlikka tushayotgan, o‘quv dasturlarini egallashga qiynalayotgan talabalarga psixologik yordam berishdan iboratdir. O‘tgan vaqt mobaynida Buxoro davlat universiteti talabalarining psixolog bilan qator .uchrashuvlari tashkil etildi. Uchrashuvlarda malakali psixologlar tomonidan talabalarga psixolog kimligi, u nima vazifani bajaradi, qachon va qaysi muammolar yuzaga kelganda psixologga murojaat etish kerak, psixologning funktsional vazifasi nimalardan iborat ekanligi to‘g‘risida tushuntirish ishlari olib borildi. Ayniqsa,“O‘zingizni boshqara olasizmi?”, “Siz jur‘atlimisiz?”, “O‘z mulohazangizga egamisiz?”, “Tanlagan kasbingiz qiziqarlimi?”, “Siz turmush qurishga tayyormisiz?” mavzusida test savollari talabalar orasida katta qiziqish uyg‘otdi. Test so‘rovlari natijalari talabalar orasida muhokama qilindi va psixologlar tomonidan jahlni jilovlay bilmaslik asablarning zo‘riqishiga olib kelishi va natijada yoshlarning do‘stlari, o‘qituvchi va ota-onalari o‘rtasidagi munosabatlarda muammolar yuzaga kelishi, bu esa ularning sog‘ligi bilan birga o‘qishiga ham jiddiy xavf solishi tushuntirildi va ularga psixologik maslahatlar berildi. Shu bilan birga imtihonlar davrida bilim natijalariga salbiy ta‘sir ko‘rsatadigan ruhiy zo‘riqish, kuchli hayajonlanishning oldini olishga doir maslahatlar berildi. Tabiiy fanlar fakulteti yoshlar bilan ishlash (ma‘naviy-ma‘rifiy ishlar) bo‘yicha dekan o‘rinbosari Rustam Yunusov: - O‘quv dargohimizda psixolog xizmati tashkil etilganidan juda xursandmiz. Ko‘p hollarda nima sababdan asabiylashayotganingni bilmaysan yo bo‘lmasa bilib-bilmay yaqin kishilaringni ranjitib qo‘yishing mumkin. Bunday tushunmovchilik hatto o‘zingizning kayfiyatingizni ham tushirib yuboradi. Albatta bunday paytda psixolog maslahatiga juda muxtoj bo‘lasiz. Fakulьtetitimizda 1148 nafar talabaga 88 ta professor- o‘qituvchilar ta‘lim-tarbiya bermoqda. Albatta, bilim berish va bilim olish jarayoni juda faol jarayon, katta iroda kuchi, diqqat va xotirani talab qiladi. Bu esa o‘z-o‘zidan o‘qituvchi va talabalarning ruhiy zo‘riqishiga olib keladi. Shundan kelib chiqib, mana bugun 2-3 va 2-4 bio-18, 2-1 tuproq-16, 2-2 eko-18 va 2-1 eko-16 guruh talabalari bilan psixolog uchrashuvlari tashkil etildi. Albatta uchrashuvlar juda qizg‘in o‘tdi. Talabalar o‘zlarini qiziqtirgan savollariga javob oldilar. Tabiiy fanlar fakulteti 2-3 BIO-18 guruhi talabasi Nigina Hamidova:- Ruhiy zo‘riqish birinchi kurs talabalari orasida ko‘proq uchrasa kerak. Chunki, notanish, begona joy, ota-onadan uzoqda, barcha muammolarni o‘zing yechishingga va o‘zing qaror chiqarishingga to‘g‘ri keladi. Mana shunday vaqtda kimningdir maslahatiga muxtoj bo‘ladi kishi. Universitetimizda shunday vaqtlarda mutaxassis xizmatidan foydala olish imkoni tug‘ilganidan juda mamnunmiz. Guruhimiz tomonidan psixolog bilan bizlarni qiziqtirgan mavzularda uchrashuvlar ko‘proq tashkil etilishi taklifi berildi. BuxDU psixologi: Dilbar Hamdamova
