Vatan himoyasi - har bir fuqaroning sharafli burchi Reja: Millatim nasli bashardur, Vatanim - kurrayi arz,Ikkisin xizmati farzdur, ikkisidin jon qarz!Hamza Hakimzoda NiyoziyBu dunyoda shunday bir ilohiy kalom borki, uni tilga olgan har bir kishining qalbida olam-olam g’urur, iftixor, faxrlanish hissi jo’sh uradi.Bu Vatan so’zidir. Bu kalom o’z zamirida qanchadan qancha ma’noni mujassam etgan. Vatan bizning tug’ilib o’sgan tuprog’imiz, ilk qadam qo’ygan ostonamiz, muqaddas sajdagohimizdir. Uni jondan-da ortiq sevish, ardoqlash, uni xavf-xatarlardan himoya qilish shu Vatanda yashayotgan har bir insonning burchidir. Bu dunyoda Vatandan ortiq mo’tabar joy yo’q. Inson o’z onasini qanchalar hurmat qilib, sevsa, o’z vatanini ham shunchalar ardoqlashi zarur. Chunki mehribon onamiz bizni go’daklikdan oq yuvib, oq tarab voyaga yetkazadi. Vatanimiz ham bizni o’zining qaynoq quchog’ida ulg’aytiradi. Shuning uchun ham biz Vatan so’zini dunyodagi eng muqaddas zot nomi bilan tilga olamiz, uni Ona Vatan, deya ardoqlaymiz. Vatanimiz Alloh tomonidan bizlarga berilgan eng ulug' ne'matdir. Sharqdan chiqadigan quyosh har tongda o'zining saxovatli nurlarini o'lkamiz tuprog'iga sochadi. Vatanimizda to'rt fasl ham birday o'z go'zalligi-yu tarovatini namoyon etadi. Ona diyorimizning bir hovuch tuprog'i uchun ne-ne bobolarimiz qon to'kkanlar, uni ko'z qorachig'idek himoya qilganlar. Abdurauf Fitrat ta'kidlaganidek: "Vatan mening jon-u tanim, sajdagohimdir. U mening oyim, tinch-omonim, izzatim, sharafim, Ka'bam, qiblam hamda gulistonimdir". Ona Vatanimiz Yaratgan tomonidan bizlarga in'om etilgan ilohiy ne'matdir. Vatan insonning kindik qoni to'kilgan xonadon tuprog'idan boshlanadi. Shu bois, inson ilk bor nafas olib, ulg'ayib voyaga yetgan ona zaminga mehr-muhabbat va sadoqatda bo'lishi, uning har bir hovuch muqaddas tuprog'ini ko'zlariga to'tiyodek surtishi, unga nisbatan bir umr farzandlik hissi bilan yashashi uning uchun ham farz, ham qarzdir. Uni ko'z qorachig'iday asrab-avaylash, himoya qilish nafaqat, Vatan himoyachilarining, balki shu o'lkada istiqomat qilayotgan har bir insonning burchidir. Inson bu dunyoga kelar ekan, o'ziga berilgan ne'matlarning qadriga yetib, shukr qilib yashashi kerak. Jonajon diyorimizni ham asrab-avaylash bizga ajdodlarimizdan qolgan muqaddas va sharafli vazifadir. Tarixga nazar solsak, bobolarimiz ham Vatan uchun o'z jonlarini fido qilganlar, uning hurligi, tinchligi yo'lida kurashganlar. Jaloliddin Manguberdi, Temur Maliklar ona yurtini mo'g'ul bosqinchilaridan himoya qilish uchun o'z hayotini qurbon qilgan bo'lsalar, Sohibqiron Amir Temur Vatanning farovonligi, obodligi, tinchligi yo'lida ulkan ishlarni amalga oshirgan. Mahmudxo'ja Behbudiy, Abdurauf Fitrat, Abdulla Qodiriy, Cho'lpon, Abdulla Avloniy, Munavvarqori singari bobolarimiz millatning ertasi, Vatanning ozodligi, tarqqiyoti yo'lida shahid bo'lganlar. Biz ona yurtimizni himoya qilishni, uni asrashni shu insonlarning faoliyatlaridan o'rganishimiz lozim. Bu ulug' zotlarning ibratli hayoti bugungi kun yoshlari uchun o'rnakdir. Bugungi kun yoshlari ham ona yurt himoyasi uchun har doim tayyor turmoqlari lozim. Istiqlol yillarida jadal rivojlanayotgan O'zbekistonimiz tinchligi va farovonligi biz, kelajak egalari bo'lgan yoshlarning qo'lidadir. Mamlakatimiz Prezidenti Shavkat Mirziyoyev tashabbuslari bilan qabul qilingan "O'zbekiston Respublikasini yanada rivojlantirish bo'yicha Harakatlar strategiyasi"ning beshinchi bandida ham xavfsizlik masalasi o'z ifodasini topgan. Hozirgi yoshlar o'z ajdodlariga munosib ravishda mamlakat xavfsizligi, tinchligi yo'lida xizmat qilishi zarur. Har yili mamalakatimiz miqyosida keng nishonlanadigan 14- yanvar "Vatan himoyachilari" kuni bugungi osuda kunlarimizning qadriga yetish, har bir fuqaroning ko'nglida ona yurtga bo'lgan mehr-muhabbatni kuchaytirishga qaratilgan qutlug' bayramdir. O'zbekiston Respublikasining Birinchi Prezidenti Islom Abdug'aniyevich Karimov o'zlarining "Milliy armiyamiz - mustaqilligimizning, tinch va osoyishta hayotimizning mustahkam kafolatidir" asarlarida: "Vatan himoyachilari kunini faqat harbiy xizmatchilar emas, ayni vaqtda armiya saflarida o'z burchini o'tab qaytgan vatandoshlarimiz va ertaga xizmatga boradigan ming-minglab navqiron farzandlarimizning qutlug' bayrami deb qabul qilishimiz, uni eng ulug' va eng aziz bayram - Mustaqillik bayrami singari yuksak darajada nishonlashimiz lozim",-degan edilar. Bobolarimiz bizga shunday Vatanni meros qoldirganlar. Ular bugungi kun kabi dorilomon kunlarni orzu qilganlar. Ne baxtki, biz shunday kunlarda yashayapmiz, hayot kechiryapmiz. Shuning uchun ham har bir fuqaro o'z diyorini, tug'ilib o'sgan ona tuprog'ini himoya qilmog'i darkor. Bu ajdodlarimizdan biz avlodlarga meros bo'lib qolgan sharafli burchdir! Buyuk adib G'afur G'ulom o'zining "Yigitlarga" deya nomlangan she'rida shunday satrlarni keltiradi:"Yigitlar xalqlarning maqtovi, ko'rki,Naslning javhari, davlat tayanchi.Yurtning obodligi, to'ylar sababi,Elning gurkirashi, fayzi, quvonchi,Yigit omon bo'lsa, xavf-u xatar yo'q!" Darhaqiqat, yigitlar yurtning, millatning tayanchi, himoyachisi hisoblanadi. Vatanni chin dildan sevadigan, ardoqlaydigan, yuragida Vatanga bo'lgan muhabbat hissi jo'sh urib turadigan yigitlargina Vatanning haqiqiy himoyachisi degan sharafli nomga munosibdir. Ular o'z yurti oldidagi yigitlik burchini o'tash uchun sidqidildan xizmat qiladilar. Kun-u tun Vatanimiz sarhadlarida sergak turib uni qo'riqlaydilar. Bugungi kunda ham o'z yurtining tinchligi yo'lida fido bo'lgan jasur, mard askarlar bisyor. Ular o'zlarining yigitlik burchini bajarish yo'lida halok bo'laganlar. Shunday jasur askarlardan biri baxmallik qahramon Botir Valiyevdir. U Qirg'izistondan O'zbekiston chegarasini noqonuniy tarzda buzib o'tmoqchi bo'lgan jinoyatchilarga qarshi kurashish chog'ida halok bo'lgan edi. Botir Valiyev va u kabi mard askarlarning fidoyiliklari hech qachon unutilmaydi. Zero, Vatan himoyasi yo'lida jon berganlar xalqning, millatning xotirasida mangu yashaydi!Biz navqiron avlod barkamol, yetuk bo'lib voyaga yetsak, o'zimizda or-nomus, milliy g'ururni izchil shakllantirib borsak, Vatanimiz shunchalik qudratli davlatga aylanadi. Vatanni, xalqimiz tinchligi va osoyishtaligini ishonchli himoya qilish, vatanparvar bo'lish, sodiqlik, fidoyilik tuyg'ularini his etib yashash jannatmakon O'zbekistonimizda yashayotgan har bir insonning sharafli burchidir! Buxoro davlat universiteti filologiya fakulteti filologiya va tillarni o'qitish (o'zbek tili) ta'lim yo'nalishi 6-1Uzb-17 guruhi talabasi Teshayeva Gulnoza
