Buxoro viloyat hokimligi, Vobkent tumani hokimligi, O‘zbekiston tarixchilar jamiyati Buxoro viloyati bo‘limi, Buxoro davlat universiteti, Vobkent tumanidagi 1-son o‘rta umumta’lim maktabi hamkorligida "Kitobxonlik madaniyati - insoniyat va jamiyat ma’naviyati ko‘zgusi" mavzusida tadbir o‘tkazildi. Unda O‘zbekiston xalq shoiri Jamol Kamolning 6 jildlik "Tanlangan asarlar"i taqdimoti tashkil etildi. Kechani Vobkent tumanidagi 1-son o‘rta umumta’lim maktabi direktori O. Rahmonov olib bordi.Unda shoirning sinfdosh do‘stlari, Anvar mirzo Huxainovning qarindoshlari, o‘quvchi-yoshlar, talabalar ishtirok etishdi. Taqdimotda O‘zbekiston tarixchilar jamiyati Buxoro viloyat bo‘limi rahbari, A. Hamroev, Buxoro davlat universiteti professori, filologiya fanlari doktori D. Quvvatova, shu universitet dotsenti, filologiya fanlari nomzodi L. Sharipova, Buxoro muhandislik-texnologiya instituti mustaqil izlanuvchisi M. Rahmonovalarning Jamol Kamol ijodiga bag‘ishlangan ma’ruzalari tinglandi. Buxoro davlat universiteti Filologiya fakultetining "Fitrat" talabalar teatri tomonidan shoirning "Armon" dostoni asosida sahna ko‘rinishi namoyish etildi. Ma’ruzalar va mazkur sahna ko‘rinishi qatnashchilarda iliq taassurotlar uyg‘otdi. Shu bilan birga taqdimot davomida Jamol Kamolning 6 jildlik kitoblari Vobkent tumanidagi 1-son o‘rta umumta’lim maktabining kutubxonasiga, maktab o‘quvchilariga va “Anvarmirzo hikoyatlari” kitobi qahromonlarining oila a’zolariga sovg‘a qilindi.
