Til xalqning o`tmishi va bugunini bog`lovchi mustahkam ko`prik, ajdodlar merosini avlodlarga yetkazib beruvchi ulug` karvondir. «O`zbek tafakkurining ini’kosi», ulug` istiqlolning nurafshon yo`liga chiqqan xalqimizning g`ururi, iftixori bo`lmish ONA TILIMIZning davlat tili maqomini olganiga ham 28 yil to`ldi…Buxoro davlat universiteti filologiya va tillarni o`qitish (o`zbek tili) ta’lim yo`nalishi o`zbek tilshunosligi kafedrasi tomonidan o`zbek tiliga davlat tili maqomi berilgan kunning 28 yilligiga bag`ishlangan ma’naviy-ma’rifiy tadbir o`tkazildi. Tadbirni filologiya fakulteti dekani dotsent, f.f.nomzodi Haydarov Anvar Asqarovich ochib beradi va onadek mo`tabar tilimizning mavqeyi, ravnaqi haqida gapirdi.Tadbir, asosan, 1- va 2-kurs talabalari ishtirokida o`zbek tilshunosligi kafedrasi dotsenti Yo`ldosheva Dilorom hamda shu kafedra o`qituvchisi G`aybullayeva Nafisalar rahbarligida tashkil etildi. Tadbirda ona tilimizni tarannum etuvchi she’rlar o`qildi, kuy-qo`shiqlar ijro etildi.28 yil... Shu yillar oralig`ida ezoz topgan, qadri yuksalayotgan ona tilimizning mavqeyi, nufuzi yana bir karra yuqoriladi, desak mubolag`a bo`lmas. E’tibor bering-a… Inson taqdir taqozosi bilan o`zi uchun qadrli juda ko`p narsalardan voz kechishi mumkin. Hatto ota-onasidan, qarindosh-urug`idan, yaqinlaridan voz kechganlarni ko`rdik, bildik… Odamzod ona-yurtidan ham ayro yashashi mumkin ekan. Ammo inson zoti voz kecha olmaydigan uning doimiy hamrohi bo`lgan muhim bir jihat bor: bu uning ONA TILI ekanligiga alohida e’tibor qaratildi.Tadbirda Buxoro davlat universiteti filologiya fakultetida uzoq yillar mehnat qilgan, hozirda oramizda bo`lmasalar-da, nomlarini mangulikka muhrlagan, ona tilimiz va adabiyotimizning ravnaqi uchun munosib hissa qo`sha olgan ustoz olimlar: professorlar Mirzayev Mustaqim Mirzayevich, Ne’matov Hamid G`ulomovich, Vohidov Rahim Jo`rayevich, Safarov Oxunjon To`rayevich, Abdullayev Ahmad Buzrukovich, Aliyev Said Aliyevich, G`ulomov Asqar Qodirovich, Qorayev Toji Qorayevich; dotsentlar Egamberdiyev Bafo Sharipovich, Olimov Mirzaahmad Olimovich, Xayrullayev Kamol Xayrullayevich, Qosimova Munira Habibovna, Husayenova Zulfiya Kamolovna nomlari yodga olindi…Tadbir «Hech kimga bermaymiz seni, O`zbekiston!» ommaviy qo`shig`i bilan yakunlandi. Tadbir ishtirokchilari viloyat hokimligi «Tashakkurnoma» hamda fakultet «Faxriy yorliq»lari bilan taqdirlandilar.Ma’naviy-ma’rifiy tadbirda Buxoro shahar Milliy tiklanish partiyasi vakillari, BuxDU Yoshlar ittifoqi BT faollari, shuningdek, «Buxoronoma» gazetasi, «Buxoro» telekanali xodimlari ham ishtirok etishdi. Ming bir eldan bizga nasib bo`lgan tilim, Ming yillardan omon o`tib kelgan tilim. O`zbegimni asl o`zbek qilgan tilim– Tillar ichra o`zing buyuk zabonimsan, Ona tilim mening ikki jahonimsan. D.N.Yo`ldosheva, o`zbek tilshunosligi kafedrasi dotsentiShuningdek tadbir to`g`risidagi ma`lumotni Fikr.uz saytida ham ko`rishingiz mumkin.
