Buyuk mo`jizalarning biri bo`lgan badiiy adabiyot qalbni poklovchi, hayotga muhabbat uyg`otuvchi qudratli kuch sifatida, necha asrlardirki, insonni ulug`lovchi ezgu maqsadlar sari chorlab keladi. Darhaqiqat, ko`ngil kechinmalari – quvonchu qayg`ulari, iztirobu ezgu intilishlarni ta’sirchan ifodalashda, hayot mazmunini teran anglash, kelajak avlodni insoniylik, vatanparvarlik ruhida tarbiyalashda adabiyotning o`rnini boshqa hech narsa bosa olmaydi. Istibdod iskanjalaridan ozod inson qalb kechinmalari butun rang-barangligi bilan tarannum etayotgan mustaqillik davri adabiyoti haqida so`z yuritganda, beixtiyor ana shu davr adabiyotining yorqin siymolaridan biri O`zbekiston xalq shoiri Muhammad Yusuf ijobiy yodimizga keladi. O`zbekiston Respublikasi Prezidenti Islom Karimovning “O`zbekiston xalq shoiri Muxammad Yusuf tavalludining 60 yilligini nishonlash to`g`risida”gi qarori ham aynan istiqlol davri adabiyotiga bo`lgan e’tibor ifodasidir. Universitetda O`zbekiston xalq shoiri Muhammad Yusuf tavalludining 60 yilligini yuqori saviyada nishonlanishini ta’minlash maqsadida chora-tadbirlar rejasi ishlab chiqildi. Shunga muvofiq barcha fakultetlarda bir qancha davra suhbatlari va tadbirlar o`tkazib kelmoqda. Harbiy fakultetda joriy yilning 11 fevral kuni “Muhammad Yusuf va yoshlar” deb nomlangan adabiy-musiqiy tadbir o`tkazildi. “Muxammad Yusuf va yoshlar” deb nomlangan adabiy-musiqiy qismda 1 kurs tinglovchilari tomonidan Muxammad Yusuf hayoti va ijodini yoritib beruvchi slaydlar namoyish qilindi, shoir qalamiga mansub she’rlar aytildi, musiqa bastalanib, xalq orasida mashhur bo`lgan qo`shiqlardan ijro etildi. 2014 yil 24 yanvarda Buxoro davlat universitetipedagog xodimlarni qayta tayyorlash va ularning malakasini oshirish markazida Muhammad Yusuf tavalludining 60 yilligiga bag`ishlangan “Unutmoq osonmas bizlarni” deb nomlangan adabiy-musiqiy tadbir bo`lib o`tdi. Tadbir hakikiy she’rxonlik kechasiga aylandi, universetet va lisey talabalari orasida shoir ijodi bo`yicha bahru bayt bo`ldi. Bunday ko`tarinki ruh bilan o`tgan tadbirdan barcha qatnashchilar ma’naviy ozuqa oldilar. Buxoro davlat universiteti o`zbek filologiyasi kafedrasi dosenti, filologiya fanlari nomzodi N. J. Bekova rahbarligida tashkil etildi. Barcha fakultetlar orasida “Muhammad Yusuf –Vatan kuychisi” mavzusida insholar tanlovi o`tkazildi va fakultet bosqichida g`oliblikni qo`lga kiritgan talabalar universitet bosqichiga ishtirok etishdi. Tanlov ishtirokchilari orasidan mavzuning to`laqonli ochib berganligi, ijodiy yondashilganligini barchasini inobatga olib quyidagi g`oliblar aniqlandi:1 –o`rin: Odinaeva Hilola – Filologiya fakulteti O`zbek tili ta’lim yo`nalishi 3 –kurs talabasi.2 – o`rin: To`raev Farhod – Harbiy fakultet 1 kurs talabasi. 3 – o`rin: Kamolova Zarnigor - Fizika-matematika fakulteti 2 –kurs talabasi.G`oliblikni qo`lga kiritgan talabaning ijodiy inshosi va talabaning hujjatlari Respublika Tashkiliy qo`mitasiga etkazilishi hakamlar tomonidan aytib o`tildi. Tanlovning g`oliblari moddiy va ma’naviy rag`batlantirildi.
