Filologiya fakulteti tarixi

Filologiya fakulteti 1930 yilda, Chet tillar fakulteti esa 1962 yilda tashkil topgan. 1949–1970 yillarda Tarix-filologiya, 1970–1972 yillarda O‘zbek filologiyasi va chet tillar, 1972–1978 yillarda O‘zbek filologiyasi va tarix, 1973–1993 yillarda O‘zbek filologiyasi va chet tillar, 1989–1999 yillarda O‘zbek, tojik filologiyasi va chet tillar fakulteti nomi bilan faoliyatini davom ettirdi. 1995–1996 yillarda Filologik o‘quv markaziga qo‘shildi. 1996 yilning 2 mayidan 1998–1999 o‘quv yiliga qadar O‘zbek, tojik filologiyasi fakulteti nomi bilan qayta shakllandi. 2009 yildan boshlab Filologiya fakulteti nomi bilan yuritilmoqda.

Fakultetda keyingi 30 yil davomida M. Abdurahmonov, T. Qorayev, E. Qilichev, S. Saidov, M. Bozorov, Z. Toshev, B. Ahmedov, R. Vohidov, S. Azimov, Q. To‘xsanov, R. Bobokalonov, A. Haydarovlar dekan vazifasida faoliyat olib bordilar. Hozirda fakultetni filologiya fanlari doktori D. Z. Rajabov boshqarmoqda.

Fakultet ilmiy-ma’naviy salohiyatini yuksaltirishda M. Mirzayev, S. Aliyev, A. Abdullayev, V. Egamberdiyev, O. Safarov, H. Ne’matov, A. G‘ulomov, O. Rasulova, H. Zikriyayeva, M. Qosimova, Z. Husainova, N. Shukrullayev, L. Mavrina, M. Alimova, M. Qosimov, Z. Hasanova, Yu. Xon kabi ustoz professor-o‘qituvchilar hamda ular shogirdlarining munosib hissasi bor.

Ta’lim yo‘nalishlari va mutaxassisliklar

Ayni paytda fakultetda Filologiya va tillarni o‘qitish (o‘zbek tili), Filologiya va tillarni o‘qitish (rus tili), Ona tili va adabiyoti (o‘zga tilli guruhlarda), Filologiya va tillarni o‘qitish (tojik tili), Jurnalistika: bosma OAVlari jurnalistikasi, Axborot xizmati va jamoatchilik bilan aloqalar, Adabiy manbashunoslik va matnshunoslik ixtisosliklari bo‘yicha bakalavrlar hamda Lingvistika (o‘zbek tili), Adabiyotshunoslik (o‘zbek adabiyoti), Lingvistika (rus tili), Adabiyotshunoslik (rus adabiyoti), Adabiy manbashunoslik va matnshunoslik mutaxassisliklari bo‘yicha magistrlar tayyorlanadi.

Kafedralar tarkibi

— O‘zbek tili va adabiyoti kafedrasi (kafedra mudiri — filologiya fanlari doktori H. Eshonqulov);

— O‘zbek tilshunosligi kafedrasi (kafedra mudiri — filologiya fanlari nomzodi, dotsent A. Axmedov);

— Rus tilshunosligi kafedrasi (kafedra mudiri — O. Nosirov);

— Rus adabiyotshunosligi kafedrasi (kafedra mudiri — L. Nigmatova).

Mazkur kafedralarda 86 nafar professor-o‘qituvchilar, shu jumladan 20 nafar fan doktorlari, professorlar, 16 nafar fan nomzodi, dotsentlar va 40 nafar yuqori malakali o‘qituvchilar talabalarga bilim bermoqdalar.

Ilmiy unvonlar va yutuqlar

Keyingi besh yilda O‘zbek tili va adabiyoti kafedrasidan D. O‘rayeva (2018), Sh. Axmedova (2018), D. Quvvatova (2021), O‘zbek tilshunosligi kafedrasidan M. Q. Abuzalova (2020), Yo. S. Saidov (2021) professor ilmiy unvonini oldilar.

2012–2016 yillarda F-1-06 “Istiqlol davri o‘zbek adabiyotida G‘arb va Sharq adabiy an’analari sintezi” nomli fundamental davlat granti loyihasi doirasida amaliy ishlar qilindi (loyiha rahbari D. O‘rayeva).

2020 yilda O‘zbekiston Respublikasi Innovatsion rivojlanish vazirligi tomonidan e’lon qilingan “Olima ayollar granti”da “Tibbiyotga oid atamalar elektron platformasini yaratish” mavzusidagi amaliy loyiha yaratilib, 2021–2023 yillarga mo‘ljallangan A-OT-2021-2 raqamli mazkur loyiha ustida tadqiqot olib borilmoqda (loyiha rahbari M. Abuzalova).

Fakultetda 2020 yildan boshlab 10.00.01 — O‘zbek tili, 10.00.02 — O‘zbek adabiyoti ixtisosliklari bo‘yicha DSc.03.04.06.2021.Fil.72.09 raqamli Ilmiy kengashning tashkil topgani quvonarli voqea bo‘ldi. Ayni paytda qator tadqiqotchilar ilmiy ishlarini himoya qildilar.