01.10.2026

#Rektor_tabrigi

Aziz ustozlar, muhtaram professor-o‘qituvchilar, qadrli murabbiylar!

Avvalo, Siz azizlarni, ta’lim-tarbiya va ilm-fan yo‘lida fidokorona mehnat qilib kelayotgan barcha ustoz va murabbiylarimizni 1-oktabr — O‘qituvchi va murabbiylar kuni munosabati bilan chin qalbimdan samimiy muborakbod etaman!

Ustozlik — shunchaki kasb emas, balki inson taqdiriga daxldorlik, jamiyat kelajagi uchun mas’uliyat va buyuk ma’naviy missiyadir. Ustoz o‘z shogirdiga nafaqat bilim beradi, balki uning dunyoqarashini shakllantiradi, qalbida ezgulik, Vatanga muhabbat, ilmga intilish va yuksak maqsadlar sari dadil borish tuyg‘ularini kamol toptiradi.

Shu bois xalqimiz azaldan ustozni ulug‘lab, uning mehnatini eng yuksak qadriyatlardan biri sifatida e’zozlab kelgan. Har bir olimning ilmiy yutug‘i, har bir mutaxassisning kasbiy kamoloti, har bir yoshning hayotda o‘z munosib o‘rnini topishi zamirida, avvalo, ustozning sabr-toqati, bilimi va fidokorona mehnati mujassam.

Qadrli hamkasblar!

Bugun Buxoro davlat universiteti nafaqat yurtimizdagi yirik oliy ta’lim muassasalaridan biri, balki ilm-fan, innovatsiya va xalqaro akademik hamkorlik izchil rivojlanayotgan ilmiy-ma’rifiy maskan sifatida o‘z oldiga ulkan maqsadlarni qo‘ymoqda.
Universitetimiz erishayotgan har bir natija zamirida, eng avvalo, professor-o‘qituvchilarimizning bilim va salohiyati, ilmiy izlanishlari, fidoyiligi va ustozlik mehnati mujassam.

Universitetimizda ilmiy-tadqiqot faoliyatini ta’lim va amaliyot bilan uyg‘unlashtirishga ham alohida e’tibor qaratilmoqda. Ilmiy maktablarni rivojlantirish, doktorantlar va yosh olimlarni qo‘llab-quvvatlash, xalqaro ilmiy loyihalarda ishtirok etish, zamonaviy laboratoriyalar imkoniyatlaridan samarali foydalanish, ilmiy natijalarni amaliyotga tatbiq etish borasidagi ishlar izchil davom etmoqda.

BuxDUda tashkil etilayotgan xalqaro va respublika miqyosidagi ilmiy forumlar, konferensiyalar, seminarlar va workshoplar universitetimizni olimlar, tadqiqotchilar va xalqaro ekspertlar o‘rtasida tajriba almashish, yangi ilmiy g‘oya va tashabbuslarni ilgari surish uchun muhim muloqot maydoniga aylantirmoqda. Xususan, bioiqtisodiyot, yashil iqtisodiyot, barqaror rivojlanish, sun’iy intellekt, raqamli texnologiyalar, qishloq xo‘jaligi va agroinnovatsiyalar, kimyo, filologiya, turizm, iqtisodiyot, sport ilmi kabi ko‘plab yo‘nalishlarda olib borilayotgan tadqiqotlar universitetimiz ilmiy salohiyatining ko‘lami tobora kengayayotganini ko‘rsatmoqda.

Albatta, bunday natijalar o‘z-o‘zidan yuzaga kelmaydi. Ularning ortida o‘z kasbiga sadoqat bilan xizmat qilayotgan, auditoriyada talabaga bilim berish bilan birga, ilmiy laboratoriya va tadqiqot markazlarida izlanayotgan, yosh olimlarga yo‘l ko‘rsatayotgan, shogirdlarini katta ilm-fan sari yetaklayotgan fidoyi ustozlarimizning ulkan mehnati turibdi.

Bugungi kunda oldimizda turgan eng muhim vazifalardan biri — zamonaviy bilim va texnologiyalarni puxta egallagan, mustaqil va tanqidiy fikrlaydigan, ilmiy va innovatsion tafakkurga ega, Vatanimiz taraqqiyotiga munosib hissa qo‘sha oladigan yangi avlodni tarbiyalashdir.

Bu yo‘lda ustozning o‘rni beqiyos. Chunki universitetning nufuzi faqat zamonaviy binolar yoki texnologiyalar bilan emas, avvalo, uning kuchli ilmiy maktablari, salohiyatli professor-o‘qituvchilari va ular tarbiyalagan munosib shogirdlari bilan belgilanadi.

Aziz ustozlar!

Sizlarning har bir darsingiz, har bir ilmiy izlanishingiz, shogirdga bergan maslahatingiz va ko‘rsatgan yo‘lingiz kelajak uchun qo‘yilgan mustahkam poydevordir. Bugun Siz ta’lim bergan yosh ertaga olim, muhandis, pedagog, iqtisodchi, huquqshunos, tadbirkor yoki jamiyatimiz taraqqiyotiga xizmat qiladigan yetuk mutaxassis bo‘lib kamol topadi.

Ayniqsa, universitetimiz taraqqiyotiga munosib hissa qo‘shgan, boy ilmiy va pedagogik maktab yaratgan, bugun ham o‘z tajribasi va hayotiy saboqlari bilan yosh avlodga ibrat bo‘lib kelayotgan faxriy ustozlarimizga chuqur hurmat va minnatdorligimni bildiraman. Sizlarning ilmiy-pedagogik merosingiz va ustoz-shogird an’analaringiz Buxoro davlat universitetining bebaho boyligidir.

Shuningdek, ilm-fanga endigina kirib kelayotgan yosh pedagoglarimiz, doktorantlarimiz va tadqiqotchilarimizga ham katta ishonch bildiramiz. Ularning yangi g‘oyalari, zamonaviy ilmiy yondashuvlari va izlanishlari universitetimizning ertangi taraqqiyotini belgilaydi.

Muhtaram ustozlar va murabbiylar!

Ushbu qutlug‘ ayyomda barchangizga mustahkam sog‘liq, uzoq umr, oilaviy baxt-saodat va xotirjamlik tilayman. Sharafli pedagogik faoliyatingizda ulkan muvaffaqiyatlar, ilmiy izlanishlaringizda yangi kashfiyot va yutuqlar, shogirdlaringiz kamolidan esa doimo faxr va quvonch nasib etsin!

Siz tarbiyalagan har bir yoshning yutug‘i, erishgan har bir marrasi va jamiyatga keltirgan nafida ustozlik mehnatingizning mevasi namoyon bo‘lib tursin.

Ustozga bo‘lgan hurmat — ilmga hurmat, ma’rifatga ehtirom va kelajakka e’tibordir.

1-oktabr — O‘qituvchi va murabbiylar kuni muborak bo‘lsin, aziz va muhtaram ustozlar!

Hurmat bilan,
Buxoro davlat universiteti rektori,
professor Obidjon Xamidov