22.07.2026

21-iyul kuni Buxoro davlat universitetining “Universal” sport majmuasida viloyatdagi barcha oliy ta’lim muassasalari bitiruvchilari hamda yoshlar uchun mo‘ljallangan “Buxoro – Talaba Expo 2026” yirik kasb ko‘rgazmasi yuqori saviyada tashkil etildi. Tadbir tantanali ravishda Davlat madhiyasi ijrosi va muhtaram Prezidentimiz Shavkat Mirziyoyevning yoshlar ta’limi hamda bandligiga qaratilgan "Kelajakka qadam" loyihasiga bag‘ishlangan maxsus videoroligi namoyishi bilan boshlandi.

Ko‘rgazmaning ochilish marosimida Buxoro viloyati hokimi o‘rinbosari Baxtiyor Adilov hamda respublika miqyosidagi “Kelajakka qadam” markazi direktori Elmurod Xoshimov so‘zga chiqib, yoshlar uchun yaratilayotgan keng imkoniyatlar va mazkur yarmarkaning bitiruvchilar hayotidagi o‘rni haqida to‘xtaldilar. Kun davomida bitiruvchilar yirik davlat va xususiy korxonalar vakillari bilan bevosita muloqot qilib, bo‘sh ish o‘rinlari va amaliyot dasturlari bilan tanishishdi. Shu bilan birga, Buxoro davlat universiteti bitiruvchilariga oliy ma’lumot to‘g‘risidagi diplomlar tantanali ravishda topshirildi hamda maktab va texnikum o‘quvchilari uchun "Ochiq eshiklar kuni" tadbirlari o‘tkazildi.

Dastur doirasida muvaffaqiyatli tadbirkorlar — Zamira Safarova va Mamlakat Sadikova ishtirokida motivatsion biznes-treninglar, shuningdek, “ROBOKIT” MChJ va yosh ixtirochilarning innovatsion startap loyihalari taqdimoti o‘tkazildi. Tadbir yakunida Buxoro davlat universiteti jamoasining yoshlarni kasb-hunarga yo‘naltirishdagi faolligi munosib e’tirof etilib, loyihani tashkil etishda fidoyilik ko‘rsatgan bir guruh mas’ul xodimlar va tashabbuskor yoshlar tashakkurnomalar hamda esdalik sovg‘alari bilan taqdirlandilar. Mazkur yirik forum oliy ta’lim va ishlab chiqarish integratsiyasini kuchaytirishda muhim platforma bo‘lib xizmat qildi.