20.06.2026

Bugun Oliy ta’lim, fan va innovatsiyalar vaziri Qoʻngʻirotboy Sharipov Buxoro viloyatiga tashrif buyurib, Buxoro davlat universitetining Sheyxon mahallasida bunyod etilayotgan zamonaviy kampus qurilish ishlari bilan yaqindan tanishdi.

Tashrif davomida Buxoro davlat universiteti rektori Obidjon Xamidov tomonidan yangi kampus hududida amalga oshirilayotgan qurilish jarayonlari, loyihaning ustuvor yo‘nalishlari hamda zamonaviy infratuzilma yechimlari yuzasidan batafsil ma’lumot berildi. Vazir kampus tarkibida barpo etilishi rejalashtirilgan o‘quv binolari, ilmiy laboratoriyalar, talabalar turar joylari, sport inshootlari, yashil hududlar va talabalar uchun yaratilayotgan qulay sharoitlar bilan tanishdi.

Shuningdek, tashrif davomida qurilish ishlarining borishi va sifati, zamonaviy ta’lim muhitini shakllantirish, innovatsion yondashuvlarni joriy etish masalalari muhokama qilindi. Yangi kampusning ta’lim va ilm-fan rivojiga xizmat qilishi, universitetning ilmiy salohiyatini yanada yuksaltirish hamda talabalarga zamonaviy va qulay ta’lim muhitini yaratishdagi o‘rni alohida e’tirof etildi.

BuxDU Axborot xizmati.